Өскемендегі Жамбыл атындағы облыстық мамандандырылған мектеп-гимназия-интернатының есепшілеріне қатысты сот үкімі шықты, деп хабарлайды F16.kz.
Өскемен қаласының №2 соты қызмет бабын пайдалана отырып, алдын ала сөз байласу арқылы аса ірі көлемде бюджет қаражатын жымқырған мектеп бухгалтерлерін кінәлі деп тапты.
Бас бухгалтер О. мен бухгалтер Т. 2017 жылғы қаңтар айынан бастап 2024 жылғы тамыз айына дейінгі аралықта алдын ала сөз байласу арқылы 144 622 868 теңге көлемінде ақша қаражатын жымқырған. Сот үкімімен О. мен Т.-ға әрқайсысы ҚР Қылмыстық кодексінің 189-бабы 4-бөлігінің 2-тармағы бойынша 7 жыл мерзімге бас бостандығынан айыру жазасын тағайындады, — делінген облыстың соттың ресми хабарламасында.
Сондай-ақ, сотталғандардан 144 622 868 теңге көлеміндегі материалдық шығынды «Шығыс Қазақстан облысы білім басқармасы» ММ-нің пайдасына өндіру жөнінде шешім шығарылды.
Үкім заңды күшіне енген жоқ.
