Шығыс Қазақстан облысының мемлекеттік қызметшілері жаңажылдық корпоративтің орнына спорттық сайыста бақ сынап, салауатты өмір салтын насихаттады, деп хабарлайды F16.kz
Өскеменде ALTAI SPORT FEST-2025 ойындары өтті. Оған қала, аудан әкімдіктерінің, департаменттер мен басқармалардың қызметкерлері қатысты. Былтыр алғаш қолға алынған бұл сайыста өңірдің мемлекеттік қызметшілері өз отбасыларымен бірге түрлі ойындарда бақ сынаған. Осылайша, олар жаңажылдық мерекелі дастархан басында емес, спорт алаңында өткізді. Бұл игілікті дәстүр биыл да жалғасын тапты.
Спорт сайысын арнайы келіп тамашалаған облыс әкімі Нұрымбет Сақтағанов қатысушыларға сәттілік тілеп, жылы лебіз білдірді.
Санаулы күндерден соң 2025 жыл аяқталып, жаңа жылды қарсы аламыз. Биылғы жыл маңызды істер мен жетістіктерге толы болды. Осындай спорттық шаралар адамдардың басын қосып, бірлікке үйретеді әрі командалық рухты сезінуге мүмкіндік береді. Бүгінгі ойындар достық рәуіште және мерекелік атмосферада өтіп, жанкүйерлерге қуанышты сәттер сыйлады. Келе жатқан жаңа жыл әрқайсыңызға шығармашылық шабыт пен толағай табыс әкелсін!,- деді аймақ басшысы.
Мемлекеттік қызметшілер қаппен жүгіру, жастықпен төбелес, жұбайын арқалап жүгіру, командалық арқан тартыс және қорытынды эстафета деген бес сайыс түрінен сынға түсті.
Бұл фестивальге өз басым екінші жыл қатысып отырмын. Биыл 11 жастағы ұлыммен келдім. Өзім — көпбалалы анамын. Сайыс жоғары деңгейде ұйымдастырылған. Жаңа жылды осылай салауатты өмір салтын ұстанып, әріптестеріміздің ортасында көтеріңкі көңіл күймен қарсы алып жатқанымыздың тәрбиелік мәні де өте зор, — деді Зайсан ауданы Дайыр ауылдық округі әкімі аппаратының бас маманы Әдемі Ешмұханбетова.
Тартысты өткен ойындар қорытындысы бойынша Өскемен қаласының әкімдігі жеңімпаз атанды. Глубокое ауданы әкімдігі екінші орын алса, Зайсан ауданы әкімдігі үздік үштікті түйіндеді. Үздік командаларға бағалы сыйлықтар берілді.
