Риддерде Amanat партиясының бастамасымен қазақ тіліне арналған «Қазақ тілі – достық тілі» атты қалалық байқау ұйымдастырылды. Мақсат — мемлекеттік тілдің мәртебесін көтеру, этносаралық келісімді нығайту және қазақ тілінің қолданыс аясын кеңейту, деп хабарлайды F16.kz.
Іс-шараны Amanat партиясының Риддер қалалық филиалы мен «Тілдерді оқыту орталығы» КММ бірлесіп өткізді. Байқауға Риддер қаласының түрлі этнос өкілдерінен құралған командалар қатысып, қазақ тіліне деген қызығушылығы мен білім деңгейін көрсетті.
Қазақ тілі – барша қазақстандықтарды біріктіретін ортақ құндылық. Осындай сайыстар арқылы біз этнос өкілдерін мемлекеттік тілдің төңірегіне топтастырып, достық пен өзара сыйластықты нығайтамыз. Бұл – тіл саясатын жүзеге асырудағы маңызды қадамдардың бірі, – дейді Amanat партиясы Риддер қалалық филиалының төрағасы Әсем Ағажаева.
Сайыс үш кезеңнен тұрды. Алғашқы «Таныстыру» кезеңінде қатысушылар өз топтарын мемлекеттік тілде таныстырып, ерекше сәлемдесуімен көзге түсті. «Сөзмаржан» кезеңінде күнделікті тұрмыста қолданылатын қазақ және орыс тіліндегі сөздерді жұптастыру арқылы қатысушылардың тілдік қоры мен жылдам ойлау қабілеттері сыналды. Ал «Қызықты сауал» кезеңінде командалар қазақ тіліндегі мәтіндер бойынша қойылған сұрақтарға ауызша жауап беріп, тіл меңгеру деңгейін көрсетті.
