Биылғы ақпанда инфляцияның айлық деңгейі 1,1% болды. Азық-түлік – 1,3%, ақылы қызмет – 1%, азық-түлікке жатпайтын тауарлар 0,9% қымбаттады. Бұл туралы Ұлттық статистика бюросы мәлім етті, деп хабарлайды F16.kz.
Азық-түлік тауарлары ішінде бағасы төмендегендер де бар. Атап айтқанда қияр – 3,9%, басты пияз – 3,2%, апельсин – 0,9%, тауық – 0,6%, сиырдың сүбе еті 0,2% арзандаған. Ал консервіленген жүгері – 8,6%, минералды су 6,8% қымбаттаған.
Азық-түлікке жатпайтын тауарлардан кір жуатын машина –7,4%, стерильді таңғыштар – 3,8%, электр шайнек – 2,6%, смартфон 1,7% арзандаса, киім үтiктейтін тақта – 12,4%, стақандар жиынтығы – 8,9%, кір жуатын ұнтақ 1,5% қымбаттады.
Ақылы қызмет саласында кинотеатр қызмет ақысы – 2,2%, фотограф қызмет ақысы 0,5% өсті.
Биыл ақпанда жылдық инфляция 11,7% болды. Бұл дегеніміз – баға бір жылда орта есеппен 11,7%-ға жоғарылаған. Соның ішінде азық-түлік бағасы 12,7%, азық-түлікке жатпайтын тауарлар 11,6%, ал ақылы қызметтер 10,8% өсіп отыр.
БІР ЖЫЛДА НЕ ӨЗГЕРДІ?
Кейбір өнімдер арзандады:
- көк шөп (көк пияз, аскөк, ақжелкен) – 7,6%
- кәді – 6,2%
- күріш – 4,3%
- қырыққабат – 1,5%.
Ал мына өнімдер керісінше қымбаттады:
- мейіз – 8,8%
- тәтті печенье – 8,5%
- бал – 7,2%
- құрма – 5,8%.
Тұрмыстық тауарлар қымбаттады:
- душқа арналған гель – 15%
- цемент – 11,2%
- жуу және тазалау құралдары – 9,3%
- түсқағаз желімі – 5,7%.
Қызмет көрсету саласында да өсім байқалады:
- киім тазалау – 14,5%
- косметолог қызметтері – 12,7%
- жаттығу залына абонемент – 10,1% қымбаттады.
