Риддер қаласында жасөспірімдер арасында киберқауіпсіздік мәдениетін қалыптастыруға бағытталған ауқымды профилактикалық семинар өтті. Іс-шараны ШҚО ПД-ның киберқылмысқа қарсы іс-қимыл бөлімшесі жергілікті полициямен бірлесіп ұйымдастырды.
Кездесу облыстық мамандандырылған олимпиада резервінің мектеп-интернат-колледжінде өтіп, оған 250-ге жуық адам қатысты. Олардың қатарында спортшы оқушылармен бірге жаттықтырушылар, ұстаздар және ата-аналар болды.
Семинардың негізгі мақсаты – жастардың құқықтық сауатын арттыру және интернет кеңістігіндегі заңсыз әрекеттерден сақтандыру. Мамандар, әсіресе кейінгі уақытта жиі кездесетін «дропперлік» схемаларға тоқталды. Яғни, алаяқтар ұрланған қаржыны басқа біреудің банк картасы арқылы қолма-қол ақшаға айналдырып, аударымдар жасайды. Мұндай әрекеттерге қатысқан азаматтар қылмыстық жауапкершілікке тартылатыны ескертілді.
Жиында Өскемен қаласы полиция басқармасының киберқылмысқа қарсы іс-қимыл жөніндегі жедел уәкілі, полиция капитаны Ақбота Бауыржанқызы интернет-алаяқтық туралы егжей-тегжейлі түсіндірді. Оның айтуынша, қаскөйлер жастарды әлеуметтік желілер мен мессенджерлер арқылы «оңай табыс» табуға сендіріп, заңсыз әрекеттерге тартады. Ал жеке деректер мен банк карталарын басқа біреуге беру азаматты еріксіз түрде қылмысқа сыбайлас етеді.
Семинар барысында интернет-алаяқтықтың кең таралған түрлері мен олардың белгілері талқыланып, кибершабуылдан қорғанудың нақты тәсілдері ұсынылды.
Сонымен қатар жиында діни экстремизмнің алдын алу мәселелері де көтерілді. Теолог маман деструктивті ағымдардың адамды арбау әдістерін түсіндіріп, жастарды кез келген ақпаратты сыни тұрғыдан қабылдауға шақырды.
Ашық форматта өткен кездесуде қатысушылар өздерін толғандырған сұрақтарын қойып, кәсіби мамандардан тұщымды жауап алды. Оқу орнының басшылығы болашақ спортшыларға тек физикалық дайындық емес, құқықтық мәдениет пен цифрлық қауіпсіздік дағдылары да маңызды екенін атап өтті.
Құқық қорғау органдары мұндай профилактикалық шаралар алдағы уақытта да жалғасатынын жеткізді.
