«Әділ сөз» сөз бостандығын қорғау халықаралық қорының басшысы Қарлығаш Жаманқұлова Ұлттық құрылтайда бұқаралық ақпарат құралдарына қатысты мәселені қозғады, деп хабарлайды F16.kz.
Қор басшысы отандық БАҚ-ты жүйелі түрде қолдау қажеттігін айтты.
Қазір жарнаманың 65 пайызы ішкі нарықта қалмай YouTube пен TikTok платформаларына кетіп жатыр. Отандық БАҚ бәсекеге қабілеттілігін сақтау үшін тәуелсіз, мемлекеттік емес медиа платформаларды қолдау мүмкіндігін қарастыруыңызды сұраймын. Бұл сала қызметкерлеріне лайық еңбекақы төлеуге, сапалы контент жасауға жол ашады. Сонда журналистер тапсырыспен әзірленетін материалдарға немесе жасырын қаржыландыруға тәуелді болмайды. Ал оқырман БАҚ-тың артында кім тұрғанын білуге құқылы, – деді Жаманқұлова.
Сонымен қатар ол аймақтық деңгейдегі басылымдарды дамыту арқылы өз нарративтерімізді дамытуға мүмкіндік жасау қажеттігін атап өтті.
Сыртқы әсер күн санап артып келеді. Сол оқиғалардың нарративтерін өзіміз айқындауымыз керек. Медиасауаттылықты жүйелі түрде күшейту керек. Себебі ол қоғамды сыртқы манипуляциялардан қорғайды, – деді Қарлығаш Жаманқұлова.
Айта кетейік, қазір Қызылорда қаласында Мемлекет басшысы Қасым-Жомарт Тоқаевтың қатысуымен Ұлттық құрылтай өтіп жатыр.
