Бүгін Шығыс Қазақстан облысының әкімі Нұрымбет Сақтағанов 8 наурыз – Халықаралық әйелдер күніне орай әр салада еңбек етіп жүрген арулармен кездесіп, көктемнің шуақты мерекесімен құттықтады. Ашық диалог форматында ұйымдастырылған салтанатты жиынға облыстың аудан-қаласынан келген бұрымдылар қатысты, деп хабарлайды F16.kz.
Әйелдер қауымының ұрпақ тәрбиесіндегі қажырлы еңбегін атап өткен облыс әкімі, нәзік жан иелерінің отбасымен қатар Отанға да адал қызмет етіп, елдің дамуына өлшеусіз үлес қосып жатқанын айтты.
Әйел – тіршіліктің күретамыры, ұлттық құндылық пен тәлім-тәрбиенің бастауы. Мемлекет басшысы Қасым-Жомарт Тоқаев елімізде отбасы институтын нығайтуға, ана мен баланың бақытты өмір сүруіне тиісті жағдай жасау жөнінде тапсырма беріп, әрдайым назарда ұстап отыр. Әйелдер қауымы отбасының ұйытқысы болып қана қоймай, қоғамның дамуына, елдің тұрақтылығы мен бірлігін бекемдеуге әрдайым үлес қосып келеді. Алдағы 15 наурызда өтетін еліміз үшін тарихи маңызы зор референдумда да Шығыстың арулары белсенділік танытады деп кәміл сенеміз, – деді аймақ басшысы.
Дөңгелек үстел басында кезекпен сөз алып, ақжарма тілегін ақтарған ардақты аналар мен аяулы қыздар мерекеге орай алқалап, сый-құрмет көрсетіп жатқан ер азаматтарға, облыс басшылығына ризашылығын білдірді.
Шекарашы әрі төрт баланың анасы Нұргүл Тұрарова мамандығымен мақтанатынын айтты.
Шекара қызметкерлері тәулігіне 24 сағат бойы еліміздің тыныштығын күзетіп, мемлекеттің тұтастығын қорғайды. Бұл – кәсіби даярлықты ғана емес, сонымен қатар табандылықты талап ететін жауапты қызмет. Жұбайым да осы салада еңбек етеді. Біз үшін Отанға қызмет ету – қастерлі парыз, – деді шекарашы.
Салтанатты кеш барысында үлкен экраннан шағын видеоролик көрсетілді. Онда кішкентай балалар анасы туралы әңгімеледі. Алқалаған арулар аймақ басшысынан анасы туралы бір ауыз сөз айтуын сұрады. Сол сәтте облыс әкімі көңілі босап, толқып кетті. Көзіне еріксіз жас үйірілді.
Әрқайсымыз үшін ананың орны бөлек. Мен бақыттымын, анам бар. Сондай-ақ бес қыз өсіріп отырмын, тәубе. Өкінішке қарай қоғамда анасынан ерте айырылған адамдар да бар. Ондай жандарға оңай емес. Жұмыстан шаршап келгенде анаңның «Балам қалайсың?» деген бір ауыз сөзінен асқан бақыт жоқ шығар, – деп тебіренді Нұрымбет Сақтағанов.
