Президент Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде елдегі тұрақтылық пен татулықты нығайтып, ұлт бірлігін бекіте түсу үшін бірқатар маңызды міндетті қолға алу қажеттігіне тоқталды, деп хабарлайды F16.kz
Бірінші кезекте, Ассамблеяның аймақтардағы жұмысын ширату керек.
Былтыр еліміздің рухани және тарихи-мәдени ордасы – Түркістанда жаңа Достық үйі ашылды. Енді осындай Достық үйін халық тығыз қоныстанған Алматы облысында салу қажет. Бұл ғимарат аймақтың қоғамдық өмірі үшін өте маңызды орталық болмақ. Түрлі этнос өкілдері тұратын Қордай, Ұйғыр, Сайрам, Панфилов және басқа да аудандарда Ассамблея ашу керек, – деп атап өтті Тоқаев.
Сонымен қатар болашақта Достық үйлері тағы бірнеше қала мен аудан орталығында ашылмақ. Мемлекет басшысы бұл бастаманы қолдайтынын білдірді және өңірлердегі Достық үйлерін шетелдік қонақтар ат басын бұратын туристік бағыттар картасына енгізу қажеттігін айтты.
«ЕЛДЕСУ ЖӘНЕ ТАТУЛАСУ» ЖОБАСЫ
Құзырлы орган басшылары мен әкімдер Ассамблеяның этномедиация саласындағы жұмысына жан-жақты қолдау көрсетуге тиіс. «Елдесу және татуласу» жобасының ауқымын кеңейтіп, оны алдағы екі жылда бүкіл елге тарату қажет. Үкімет пен әкімдер Ассамблеяның басқа да жобаларын қоғамдық-саяси жұмыс жоспарларына қосып, нақты шаралар қабылдауы керек, – деп қосты Президент.
ЖУРНАЛИСТЕР КЛУБЫ
Мемлекет басшысы жүктеген тағы бір міндет –ақпараттық кеңістікте бірлік пен келісім идеяларын кеңінен дәріптеу. Бұл Ассамблеяның барлық құрылымына, әсіресе, журналистер клубына қатысты кезек күттірмейтін міндет.
Салалық министрлік, өңір әкімдері ҚХА журналистер клубының құрамына жетекші бұқаралық ақпарат құралдарының өкілдерін қосып, клуб жұмысының бірыңғай алгоритмін жасауы керек. Қазақстандағы этностардың тілінде шығатын, ең алдымен, өңірлердегі бұқаралық ақпарат құралдарына жүйелі түрде қолдау көрсеткен жөн, – деп қосты Тоқаев.
«БІРЛІГІМІЗ – ӘРАЛУАНДЫҚТА» ҚАҒИДАТЫ
Президент назар аударған міндеттің тағы бірі – «Бірлігіміз – әралуандықта» қағидаты. Оны жүзеге асыру үшін мәдениет пен өнердің әлеуетін толық пайдалану керек.
Александр Пушкин, Тарас Шевченко, Федор Достоевский, Михаил Шолохов және басқа да тұлғалардың музейлері – Қазақстан мәдениетінің баға жетпес қазынасын толықтырып тұр. Бұл музейлерді көпшілікке таныту үшін экспозицияларын Астана мен Алматыда және басқа да қалаларда ұйымдастыру маңызды. Кейбір этномәдени бірлестіктер бірегей өнер және этнографиялық жеке коллекцияларды жинады. Бұл да еліміздің мәдени мұрасына айналуға тиіс, – деп атап өтті Мемлекет басшысы.
ТЕАТРЛАР АЛМАТЫДА БАС ҚОСАДЫ
Бүгінгі күні елімізде тоғыз орыс драма театры табысты жұмыс істеп тұр. Сондай-ақ ерекше төрт этнос театры, яғни, ұйғыр, корей, өзбек және неміс театрлары көрерменнің көзайымы болып жүр. Қасым-Жомарт Тоқаев Ассамблеяның мерейтойы аясында осы өнер ордаларының басын қосуды ұсынды.
Ассамблеяның 30 жылдығы аясында Алматыда бәрінің басын қосып, Қазақстан этностары театр өнерінің фестивалін өткізсек болады. Халық көп келеді деп ойлаймын, – деді Тоқаев.
Естеріңізге сала кетсек, бүгін Астанада Қазақстан халқы Ассамблеясының кезекті ХХХІV сессиясы өтті. Оған Президент Қасым-Жомарт Тоқаев қатысып, сөз сөйледі.
Фото: Ақорда
