Талай жылдан бері жол азабын тартқызып келе жатқан Өскемен-Риддер бағытындағы республикалық маңызы бар трасса биыл толық жөнделеді. Бұл туралы «Қазавтожол» ұлттық компаниясы мәлім етті, деп хабарлайды F16.kz порталы qazaqstan ұлттық арнасына сілтеме жасап.
Ақпарат құралының жазуынша, былтыр 30 шақырым толық жаңартылған. Енді қалған 75 шақырымнан астам қашықтық тау арасындағы бұралаңы көп қауіпті аумақ. Сондықтан бұл бөлікті жөндеуге бес бригада жұмылдырылды.
Биыл Шығыс Қазақстан облысы аумағында 357 шақырым республикалық маңызы бар автомобиль жолына орташа жөндеу жүргізіледі. Атап айтсақ, Өскемен-Риддер, Өскемен-Шемонаиха және Өскемен-Алтай-Қатонқарағай бағытында және Қалжар-Марқакөл бағытындағы жолдар, – дейді «Қазавтожол» ҰК облыстық филиалы директорының орынбасары Алмас Хасенов.
Ұлттық компанияның мәлімдеуінше, Өскемен-Риддер жолын жөндеуге ерекше назар аударылған. Себебі бұл бағытта кен өндіретін кәсіпорындардың ауыр техникалары үздіксіз қатынайды. Ал жолдың сапалы салынуы маңызды мәселе. Ең бастысы құрылысқа қажетті тас пен топырақ жергілікті жерден алынып жатыр. Бетонның қалыңдығы 25 сантимерден кем болмайды.
