Шығыс Қазақстан облысы делегациясының Қытай Халық Республикасына жасаған жұмыс сапары барысында Самар жағалауы шетелдің туристік компанияларының қызығушылығын туғызды. Бұл туралы Шыңжаң-Ұйғыр автономиялық ауданындағы кездесулер қорытындысында белгілі болды, деп хабарлайды F16.kz.
Делегация құрамында облыс әкімінің орынбасары Бақытжан Байахметов бастаған қала және аудан әкімдері болды. Тараптар инвестициялық мүмкіндіктерді, әсіресе туризм саласындағы ынтымақтастықты дамыту мәселелерін талқылады.
Самар ауданының әкімі Серік Жеңісов қытай компаниялармен нақты келісімдерге қол жеткізілгенін айтты
Қытайдың бірқатар туристік компаниясымен кездесулер өткізіп, ынтымақтастық туралы келісімге келдік. Жазғы маусымда олар Самар жағалауына бір мезгілде шамамен 150–200 турист әкелуге дайын, – деді Самар ауданының әкімі.
Аудан басшысының айтуынша, алдағы уақытта Сарыбел демалыс аймағындағы туристік базалардың иелерімен шетелдік қонақтарды қабылдау және орналастыру бойынша келісімшарт жасау жоспарланып отыр. Бүгінде Самар ауданында 71 демалыс базасы жұмыс істейді. Барлығы 580-ден астам үй мен 3 мың туристке арналған орын бар. Бұл өңірге саяхатшылар негізінен жазда көп келеді.
Аймақта туризм инфрақұрылымын дамыту жұмыстары да қатар жүргізіліп жатыр. Былтыр Көкпекті – Самар – Васильев өткелі автожолының бір бөлігі жөнделген, биыл бұл жұмыстар жалғасады. Сонымен бірге Сарыбел жағалауында ұялы байланыс пен интернет сапасын арттыру көзделген.
Өңірде туризмді жүйелі дамыту бағытында бірқатар жоба қолға алынған. Атап айтқанда, Бұқтырма су қоймасы жағалауында заманауи серуен аймағын салу көзделіп отыр. Сондай-ақ Самар жағалауын абаттандыруға арналған бас жоспар әзірленіп жатыр.
Жергілікті билік Сарыбел және Новостройка ауылдарында жағажай аймақтарын ретке келтіріп, оларды коммуналдық жағажай мәртебесіне көшіруді ойластырып отыр. Сонымен қатар Миролюбовка ауылы маңында демалыс базаларына апаратын жол бойында санитарлық нысан салынбақ.
Бұдан бөлек ауданда оқиғаға құрылған туризмді дамытуға басымдық берілген. Биыл Open Air – Sarybel маусымының ашылуы мен BAJA GAMES SAMAR экстремалды жарысын өткізу жоспарланған.
Мамандардың пікірінше, қытайлық серіктестермен орнатылған байланыс өңірдегі туризмнің дамуына тың серпін беріп, Шығыс Қазақстанның табиғаты мен туристік әлеуетін халықаралық деңгейде танытуға мүмкіндік береді.
