Өндірістегі қауіп-қатерлерді талдап, болжауға, жұмысшылардың еңбек жағдайы мен қауіпті аймақтарды онлайн режимде бақылауға мүмкіндік беретін Біріңғай цифрлық мониторинг платформасын енгізу жоспарланып отыр. Платформа жасанды интеллект негізінде жұмыс істейді, деп хабарлайды F16.kz.
Бұл туралы Мемлекеттік еңбек инспекциясы комитетінің Шығыс Қазақстан облысы бойынша департаменті басшысының орынбасары Кайрат Аблкайров өңірлік коммуникациялар қызметі алаңында өткен брифингте мәлім етті.
Жаңа жүйенің пилоттық іске қосылуы 2025 жылға жоспарланған және ол бес ірі кәсіпорында сынақтан өтеді. Ал 2028 жылға қарай цифрлық платформа қауіп-қатері жоғары барлық өндірістерде міндетті болады.
Аймақта 3786 кәсіпорында қазір «Еңбек тәуекелдерінің картасы» ақпараттық жүйесі жұмыс істеп тұр. Биылғы 25 сәуірдегі деректерге сәйкес, 31 кәсіпорын әлеуметтік тұрақсыздық қаупі жоғары санатқа жатқызылған, 49 кәсіпорын орташа тәуекел деңгейінде болса, 3705 кәсіпорын ең төменгі тәуекел деңгейінде тұр.
Еңбек қауіпсіздігі саласындағы цифрландыруды дамыту Дүниежүзілік еңбек қауіпсіздігі күніне орайластырылған. Бұл күн жыл сайын 28 сәуірде атап өтіледі. 2025 жылдың ұраны: «Еңбек қауіпсіздігі мен гигиенасына революциялық көзқарастар: жұмыс орындарындағы жасанды интеллект пен цифрландырудың рөлі».
Фото: ШҚО өңірлік коммуникациялар қызметі
