2025 жылғы есеп деректері бойынша Қазақстанда киік саны 3,9 миллион басқа жетті. Бұл 1974 жылы тіркелген тарихи максимумнан үш есе көп (1,2 миллион), деп хабарлайды F16.kz тілшісі.
Экология және табиғи ресурстар министрлігінің ақпараты бойынша тек Батыс Қазақстан облысындағы осындай тұяқтылардың саны 2,3 миллион бастан асады екен.
Осыны ескере келе, ел Үкіметі киік санын реттеу туралы шешім қабылдаған. Бұл туралы Экология және табиғи ресурстар министрі Ерлан Нысанбаев мәлім етті.
Министрдің айтуынша, бұл ҚР Ғылым және жоғары білім министрлігі Зоология институтының ғалымдары дайындаған бионегіздеме, сондай-ақ Австралия, Финляндия, Канада, АҚШ, Оңтүстік Африка және тағы басқа елдердің жабайы жануарлар популяциясын тұрақты басқару саласындағы халықаралық тәжірибені жан-жақты талдаудан туындаған шешім.
– Ғылыми тұжырымдарға, фермерлердің ұсыныстарына және әлемде қолданылатын жекелеген түрлерді реттеу тәжірибесіне сүйене отырып, киік санын реттеу туралы шешім қабылданды, – деп атап өтті министр.
Белгілі болғандай, Экология және табиғи ресурстар министрлігі «Охотзоопром» ӨБ РМҚК күшімен және құралдарымен жануарларды іріктеп реттеу жұмыстарын жүргізбек. Жануарларды іріктеу Халықаралық табиғат қорғау келісімдеріне сәйкес, ғылыми негіздемеге сүйене отырып жасалады.
Ерлан Нысанбаев ғалымдардың биологиялық негіздемесі бойынша еліміздегі киіктердің 20 пайызы реттеуге жататынын мәлім етті. Бұл бағыттағы жұмыстар алдағы күзде басталмақ.
Зардап шеккен өңірлердің әкімдіктері ауыл шаруашылығы және экология министрліктерімен бірлесіп эпизоотиялық мониторингті, қабылдау және қайта өңдеу пункттерінің дайындығын, экологиялық заңнамаға сәйкес барлық ветеринариялық-санитариялық және өзге де талаптарды сақтай отырып, қосымша шараларды қамтамасыз етеді.
