«Энергетикалық кәсіпорындар» бастауыш партия ұйымының мүшелері коалиция өкілдерімен кездесу өткізіп, жаңа Конституция жобасын талқылады. Басқосу барысында қатысушыларға конституциялық өзгерістердің негізгі бағыттары кеңінен таныстырылып, 15 наурыз күні өтетін референдумның тарихи маңызы түсіндірілді.
Коалиция мүшелерінің айтуынша, ұсынылып отырған өзгерістер — елдегі саяси реформалардың заңды жалғасы. Ата заңды жаңғырту – мемлекеттілікті нығайтуға, билік тармақтарының теңгерімін күшейтуге және азаматтардың құқығын қорғау тетіктерін жетілдіруге бағытталған қадам. Әсіресе еңбек адамының құқығын қорғау, қауіпсіз еңбек жағдайларын қамтамасыз ету және әлеуметтік кепілдіктерді арттыру мәселелері кеңінен қозғалды.
Коалиция мүшесі Зоя Новолодская өз сөзінде жаңа Конституция ел болашағына жасалған жауапты шешім екенін атап өтті. Оның пікірінше, стратегиялық маңызы зор энергетика саласында еңбек ететін мамандарға тұрақтылық пен заң үстемдігі айрықша маңызды.
Ата заңды заман талабына сай жетілдіру – мемлекет дамуына жаңа серпін береді. Әрбір азамат 15 наурызда өз таңдауын жасап, референдумға белсенді қатысуға тиіс, – деді ол.
Кездесу барысында кәсіпорын қызметкерлері де өз ой-пікірлерін білдіріп, реформалардың сабақтастығын қамтамасыз ететін Жаңа Конституция жобасын қолдайтындарын жеткізді. Олардың пікірінше, стратегиялық сала саналатын энергетика бағытында құқықтық тұрақтылық пен әлеуметтік кепілдіктердің күшеюі – сала мамандары үшін аса маңызды фактор.
Жиын соңында қатысушылар референдумға белсенді қатысу әр азаматтың ортақ жауапкершілігі екенін атап өтті.
