Техникалық-экономикалық колледжде «Заң және тәртіп» жобасы аясында студенттерге арналған ерекше диалогтық алаң ұйымдастырылды. «Есірткі және заң: жастардың жауапкершілігі, қауіптері және қорғану жолдары» тақырыбында өткен басқосу жастардың құқықтық сауаттылығын арттыруға, заң талаптарын тереңірек түсіндіруге және есірткі айналымының алдын алу мәселелерін талқылауға бағытталды, деп хабарлайды F16.kz.
Шараға ҚАЖК №73 мекемесінің тәрбие жұмысы жөніндегі орынбасары А.Мыңғатов, ШҚО экономикалық тергеп-тексеру департаментінің аса маңызды істер жөніндегі тергеушісі Ж.Мұзтауов, Полиция департаментінің есірткі қылмысына қарсы іс-қимыл басқармасының жедел уәкілі М.Қалиакбаров және психолог-нарколог К.Ширширкова қатысып, студенттермен ашық әрі мазмұнды әңгіме өрбітті.
Спикерлер жастарға есірткі құралдарына қатысты заңсыз әрекеттер үшін қарастырылған жауапкершілік туралы негізгі заң нормаларын түсіндіріп, ақпараттың уақытында берілуі қателіктердің алдын алуда шешуші рөл атқаратынын жеткізді. Интернет арқылы жастарды заңға қайшы әрекеттерге тарту қаупі, жеке қауіпсіздікті сақтау, қауіпті жағдайларды тану дағдылары да кеңінен сөз болды. Мамандар күмәнді ұсыныстарға тап болғанда мұғалімдерге, арнайы мамандарға немесе құқық қорғау органдарына жүгінудің маңызын еске салды.
Психолог-нарколог оқу ордасындағы психологиялық тұрақтылық, стресс менеджмент және бір-біріне қолдау көрсету жастарды түрлі қауіптерден сақтайтынын атап өтті.
Диалогтық алаң еркін форматта өтті: студенттер көкейлеріндегі сұрақтарын қойып, өмірлік жағдайларды талқылап, нақты практикалық кеңестер алды.
Осындай кездесулер жас буынның саналы шешім қабылдай алатын, әлеуметтік жауапты тұлға болып қалыптасуына ықпал етіп, білім беру ұйымдары мен құқық қорғау органдарының өзара ынтымақтастығын күшейтеді.
