Шығыс Қазақстан облысында «AMANAT» партиясы жанындағы «Miras» республикалық кеңесінің көшпелі отырысы өтті. Оған аймақ басшысы Нұрымбет Сақтағанов, аталған кеңес төрағасы, ҚР Парламенті Мәжілісінің депутаты Аманжол Әлтай, партияның облыстық филиалының атқарушы хатшысы Жанат Мекеева, өңірлік кеңес мүшелері, мәдениет, білім және туризм саласының өкілдері қатысты, деп хабарлайды F16.kz.
Күн тәртібінде аймақтық кеңес жұмысының нәтижелері, мәдени саясатты дамыту бағыттары және туризм әлеуетін арттыру мәселелері қаралды.
«Miras» республикалық кеңесінің көшпелі отырысы — мемлекет, қоғам және сарапшылар қауымдастығы өкілдерін біріктіріп, мәдениет, рухани даму және қоғамдық келісімді нығайту салаларындағы маңызды міндеттерді шешуге бағытталған беделді диалог алаңы. Шығыс Қазақстанда мәдени инфрақұрылым жүйелі түрде дамып, талантты жастардың әлеуетін ашуға жағдай жасалып келеді. Облыстағы театрлар, музейлер, кітапханалар мен мәдениет үйлері халыққа сапалы қызмет көрсетіп, ұлттық құндылықтарды кеңінен насихаттауда, — деді Нұрымбет Сақтағанов.
Облыс әкімінің айтуынша, Шығыс Қазақстан туризм орталығы ретінде өз позициясын сенімді түрде нығайтып келеді. Алтай, Марқакөл, Катонқарағай, Зайсан және Бұқтырмадағы демалыс орындары тек қазақстандықтар үшін емес, шетелдік қонақтар үшін де тартымды бағыттарға айналып отыр.
Отырыс барысында Жанат Мекеева өңірлік «Miras» кеңесінің атқарған жұмыстары жөніндегі баяндама жасады. Ал ШҚО мәдениет басқармасының басшысы Самат Қасенов соңғы бір жылда ұйымдастырылған шараларға тоқталды.
Алғаш рет ұйымдастырылған «Бұқтырма балықшысы – 2025» фестивалі дәстүрлі балықшылар мәдениетін ұлттық құндылықтармен ұштастырып, қысқы туризмнің дамуына серпін берді. Өңірдегі ең ірі мәдени оқиғалардың бірі — Катонқарағай ауданында өткен «Алтай — түркі әлемінің алтын бесігі» халықаралық фестивалі болды. Фестиваль түркі халықтарының ортақ тарихи тамырлары мен рухани бірлігін дәріптеуге, Шығыс Қазақстанның халықаралық имиджі мен туристік тартымдылығын арттыруға ықпал етті. Бүркітшілік өнерін насихаттауға бағытталған «Шығыс Салбурыны» халықаралық фестивалі ұйымдастырылып, шараға 140-тан астам бүркітші қатысты. Қысқы туризмді дамытуға арналған «Аяз ата, Ақшақар – 2025» халықаралық фестивалі өңір тұрғындары мен қонақтарына мерекелік атмосфера сыйлады, — деді ол.
Биыл өңірде жыр, терме, күй және айтыс бағыттары бойынша бірқатар ауқымды мәдени іс-шаралар өткізу жоспарланған. Олардың қатарында халықаралық фестивальдер, республикалық деңгейдегі айтыстар және ерекше қажеттіліктері бар азаматтарға арналған арнайы мәдени жобалар бар.
Оның бірі бүгін өтетін «Алтайым алтын – бесігім» командалық айтысы. Ал «Алтай – түркі әлемінің алтын бесігі» халықаралық музыкалық фестивалі 10-11 шілде күндері өткізілмек.
