Кеше, 24 қарашада күні бойы жауған қар ымырт үйіріле тоқтады. Бұл аралықта «Таза Өскемен» коммуналдық мекемесінің жұмысшылары бір сәт тыным тапқан жоқ. Қала көшелерін қардан тазарту әлі жалғасып жатыр, деп хабарлайды F16.kz.
Түні бойы қалада арнайы техникалар мен жол бригадалары дамыл таппай жұмыс істеді. Міндет біреу — таңертеңге дейін қарды күреп, сыртқа шығару, қауіпсіз әрі жайлы қозғалысты қамтамасыз ету, — деп хабарлады «Таза Өскемен» КМК.
Коммуналдық мекеме басшылығы табиғат тосын мінез танытқан сәтте сабыр сақтап, жағдайға түсіністікпен қарап, қолдан келгенше қолдау білдірген өскемендіктерге алғыс айтты.
Қаладағы бүкіл қарды бір сәтте күреу мүмкін емес, қалың жауып қалды, оны тазарту уақытты және үйлесімді жұмысты қажет етеді. Коммуналдық қызметтер қала көшелері қардан тазарып, қозғалыс қалыпқа келгенше күшейтілген режимде жұмысын жалғастырады, – деп мәлімдеді «Таза Өскемен» КМК.
