Еліміздің Ұлттық қауіпсіздік комитеті республика аумағында жедел іздестіру шараларын жүргізіп, заңсыз айналымда жүрген қару-жарақ пен оқ-дәрілерді анықтады. Оның ішінде Қаңтар оқиғасы кезінде ұрларған қару-жарақ та бар, деп хабарлайды F16.kz.
Президент тапсырмасын орындау барысында биылғы қыркүйекте ҰҚК полиция органдарымен бірлесіп және прокуратураның үйлестіруімен Алматы, Шымкент қалаларында, Атырау, Жамбыл, Қарағанды, Қызылорда, Алматы, Батыс Қазақстан, Түркістан, Ұлытау, Абай, Жетісу облыстарында қару-жарақты іздестіру және заңсыз айналымнан алу бойынша бірқатар жедел-іздестіру іс-шарасын жүргізді. Нәтижесінде 62 дана қару-жарақ, оның ішінде үш Калашников автоматы, 16 тапанша, 43 мылтық, төрт граната және 4 мыңнан астам оқ-дәрі тәркіленді. 2022 жылғы қаңтарда ұрланған 10 қару-жарақ анықталды.
Көрсетілген фактілер бойынша жедел-тергеу іс-шаралары жүргізіліп жатыр. Бұл бағыттағы жұмыстар жалғасады, – деп жазды ҰҚК баспасөз қызметі.
