Биылғы 24 қарашада толассыз жауған қар Өскеменде көлік қозғалысын қиындатып, қолайсыздық тудырды. Қазір шаһарды қардан тазалау үшін коммуналдық қызметтер күшейтілген режимде жұмыс істеп жатыр, деп хабарлайды F16.kz.
Өскемен қаласының әкімі Алмат Ақышов қар күреу және қыс мезгіліндегі жол қауіпсіздігін қамтамасыз ету мәселелеріне арналған аппараттық кеңес өткізді.
Біз халық алдында үлкен жауапкершілік алып отырмыз. Осы орайда күні-түні тік тұрып, қар тазалау жұмыстарына кіріскен коммуналдық қызметкерлерге алғыс айтамын. Ал сіздер осы жұмыстарды ұйымдастырушы ретінде міндеттеріңізді дұрыс орындай алмадыңыздар. Көп сын айтылды. Қыс мезгілінде негізгі жұмыс — қаланы қардан тазалау. Сондықтан бұл мәселені тез арада шешу қажет, — деді шаһар басшысы.
Қазір балабақша, мектеп, медициналық мекемелердің маңын тазартуға, қоғамдық көлік пен жедел қызметтердің қозғалысын қамтамасыз ететін бағыттарды қардан аршуға басымдық берілген. Сонымен қатар негізгі және қосымша көшелерді, жаяу жүргіншілер жолын, аялдамаларды және аула аумақтарын тазарту жұмыстары кезең-кезеңімен жүргізіледі. Бұл жұмыстарға барлық техника жұмылдырылған.
«Таза Өскемен» мекемесі басшылығының айтуынша, жауған қар еріп, нығыздалып, жағдайды қиындатып тұр.
