Қазақстандықтардың 85,7%-ы Президент Қасым-Жомарт Тоқаевтың Қарулы Күштерді реформалау туралы шешімін толық немесе ішінара қолдайды, деп хабарлайды «Демократия институты» ғылыми-зерттеу қауымдастығы.
Қауымдастық Мемлекет басшысы қабылдаған шараларға қоғамның көзқарасын анықтау мақсатында 28-29 қыркүйекте сауалнама жүргізген.
Зерттеу нәтижесіне сәйкес, респонденттердің 85,2%-ы Қорғаныс министрлігінің қызметіне кешенді тексеру жүргізу туралы шешімді толық немесе ішінара қолдайды. Ал армияны реформалау туралы шешімді оң бағалағандардың үлесі 85,7%-ды құрады.
Сауалнама барысында қатысушыларға армияда қандай өзгерістер қажет деген сұрақ қойылып, бірнеше жауапты таңдауға мүмкіндік берілген.
Ең көп қолдау тапқан ұсыныс – Қорғаныс министрлігінің ашықтығы мен есептілігін арттыру. Бұл бағытты респонденттердің 47,4%-ы атаған.
Командалық құрамды жаңарту және оның кәсіби деңгейін көтеруді 34,3%, қорғаныс саласындағы жемқорлыққа қарсы күресті күшейтуді 29,4% қолдаған.
Сауалнама нәтижесі қоғамның армияда жан-жақты өзгеріс күтетінін көрсетеді. Елдің қорғаныс қабілетін нығайтумен қатар, жұрт әскери қызметтің күнделікті ұйымдастырылуы да жақсарғанын қалайды, – делінген зерттеу қорытындысында.
Әскери қызметшілердің қауіпсіздігі мен әлеуметтік жағдайын жақсартуды сауалнамаға қатысқандардың 25,3%-ы маңызды деп санайды. Қару-жарақ пен әскери техниканы жаңартуды 20,7%, жаңа технологияларды, оның ішінде цифрлық шешімдерді енгізуді 20,4%, жауынгерлік даярлық пен оқу-жаттығу деңгейін көтеруді 19,2% атаған.
Сауалнаманы «Демократия институты» ғылыми-зерттеу қауымдастығы 2026 жылғы 28-29 қыркүйекте онлайн-сауалнама (CAWI) әдісімен жүргізген. Оған еліміздің 17 облысы мен Астана, Алматы және Шымкент қалаларынан 18 жастан асқан 1012 респондент қатысқан.
