Бүгін Пушкин атындағы облыстық кітапханада Наурызнама онкүндігі аясында ұлттық киім дефилесі өтті, деп хабарлайды F16.kz.
Шараның мақсаты – ұлттық кодты жаңғырту, ата-баба дәстүріне құрмет көрсету және қазақы нақыштағы киімдерді күнделікті өмірде кеңінен насихаттау. Кешке жиналған қонақтар ұлттық киім үлгісінде келіп, ерекше сән мен салтанатқа куә болды.
Кеш аясында ұлттық құндылықтар кеңінен дәріптеліп, қазақтың дәстүрлі әндері шырқалды.
Бағдарлама барысында ұлттық киімдердің тарихы мен ерекшеліктері туралы танымдық мәлімет беріліп, ою-өрнектердің мән-мағынасы кеңінен түсіндірілді. Аталар жас ұрпаққа ақ батасын беріп, әжелер ұлттық киім үлгілерінің шығу тарихы туралы тағылымды әңгіме жүргізді. Заманауи технологиялар да назардан тыс қалмады. Жасанды интеллект көмегімен дайындалған бейнематериалда ұлттық элементтердің қазіргі сән индустриясымен үйлесімі көрсетілді, — деді шара ұйымдастырушылары.
Сонымен қатар шара барысында көрермендермен интерактивті ойын ұйымдастырылып, белсенді қатысушыларға сыйлықтар табысталды.
