Қазақстан Республикасының Ұлттық қорғаныс университеті базасында Қарулы күштер басшылығының қызметтік жиналысы өтіп, жауынгерлік даярлық жүйесін жетілдіру мәселелері қаралды.
Қорғаныс министрі, авиация генерал-лейтенанты Дәурен Қосанов оқу процесінде практикалық бағытты күшейтіп, командирлердің жеке жауапкершілігін арттыру қажеттігін атап өтті. Ал Бас штаб бастығы Қаныш Әбубәкіров жоғары жауынгерлік даярлық деңгейіне келтіру шаралары мен кенеттен тексеру нәтижелерін талдады.
Жиында оқу-жаттығу циклін жоспарлау, бірыңғай оқ ату курсын және дене даярлығы нормативтерін жаңарту, барлау бөлімшелерін жетілдіру мәселелері көтерілді. Сондай-ақ жеке құрамның моральдық-психологиялық ахуалына назар аударылып, заманауи жұмыс тәсілдері таныстырылды.
Кездесу қорытындысында даярлық бағдарламаларын жаңғырту және бөлімшелердің жауынгерлік әзірлігін объективті бағалау тетіктерін енгізу бойынша нақты тапсырмалар берілді.
