Саясаттанушы Марат Шибұтов жаңа Конституция жобасына қатысты әлеуметтік желілерде тараған қауесеттер мен жалған ақпаратты жоққа шығарды. Оның айтуынша, Конституциялық комиссияның жұмысы туралы шындыққа жанаспайтын мәліметтер әдейі таратылып жатыр.
Шибұтов комиссия отырыстарына өзі қатысып жүргеніне қарамастан, желіде өзін «бәрін білетіндей» көрсететін адамдар көп екенін атап өтті. Құжаттар жұртшылыққа ашық жарияланғаннан кейін де ақпаратты бұрмалау тоқтамаған. Саясаттанушы мұны жай қателік емес, қасақана әрекет деп бағалады.
Ол «жаңа Конституция саяси монополияға жол ашады» деген пікірмен келіспейді. Керісінше, құжатта азаматтардың саясатқа қатысу мүмкіндігін кеңейтетін жаңа өкілді орган – Халық Кеңесін құру көзделген. Жаңа Кеңесте мәслихат өкілдерімен қатар қоғамдық кеңестер, қоғамдық ұйымдар мен Қазақстан халқы Ассамблеясының өкілдері болады. Осылайша азаматтық өкілдік бұрын-соңды болмаған деңгейге жетпек.
Саясаттанушының айтуынша, Халық Кеңесі қарапайым азаматтардың саясатқа араласуын жеңілдетеді. Бұл – ел тарихындағы маңызды өзгеріс.
Сонымен қатар Шибұтов Конституциялық комиссияның «жабық жұмыс істейді» және «құрамы дұрыс емес» деген сынға жауап берді. Оның сөзінше, отырыстар тікелей эфирде көрсетіліп жатыр, ал комиссия мүшелерінің едәуір бөлігі – қоғамдық ұйымдар, БАҚ, білім және ғылым саласының өкілдері.
Жаңа Конституция жобасында Президент пен Құрылтай арасындағы кадрлық өкілеттіктер нақты бөлінеді. Құрылтай Премьер-Министрді, Вице-президентті, Конституциялық сот, Орталық сайлау комиссиясы, Жоғарғы аудиторлық палата және Жоғарғы сот судьяларын тағайындауға немесе келісім беруге қатысады. Ал Президент бірқатар лауазымдарды жеке өзі тағайындау құқығынан айырылады.
Дегенмен Мемлекет басшысы негізгі конституциялық органдардың төрағаларын және өзіне есеп беретін құрылымдардың басшыларын тағайындау өкілеттігін сақтайды. Марат Шибұтовтың пікірінше, мұндай жүйе билік институттары арасындағы тепе-теңдікті қамтамасыз етеді.
