Облыс орталығынан 400 шақырым қашықта жатқан Марқакөл ауданында биыл 16 тұрғын үй салынады. Аудан халқының 82 пайызы интернетпен қамтылады. Бұл туралы Шығыс Қазақстан облысының әкімі Нұрымбет Сақтағанов шекарадағы өңір тұрғындарымен кездескен кезде айтты, деп хабарлайды F16.kz.
Марқакөл жұртымен кездесуде аймақ басшысы ауданның 2029 жылға дейінгі даму жоспарын таныстырды. Оның айтуынша, алдағы үш жылда ауданға мемлекеттік бюджеттен бөлінетін қаржының көлемі 52 миллиард теңгеден асады, ал жекеменшік инвестиция 15,5 миллиард теңгенің үстінде болмақ.
Марқакөл ауданы халқының 82,4 пайызы интернетке қол жеткізе алады. Цифрлық инфрақұрылымды кеңейту бағдарламасы аясында биыл наурызда Шеңгелді және Игілік ауылдарына мобильді интернет желісі тартылды, – деді облыс әкімі.
Ашық диалог форматында өткен жиында Нұрымбет Сақтағанов ауызсумен қамту бағытында атқарылған жұмыстарға тоқталды. Бүгінде Марқакөл ауданының барлық 23 елді мекен 100% таза ауызсумен қамтылған. Қазір екі жоба жүзеге асырылып жатыр. Олар: құны 300 млн теңге болатын Марқакөл ауылының су құбыры желісінің құрылысы және құны 200 млн теңге болатын Боран ауылындағы су құбырының жөндеу жұмысы. Бұл жұмыстар қазан айының басына дейін аяқталуға тиіс.
Марқакөл тұрғындары облыс әкімінен жұмыспен қамту, үй жануарларына вакцина салу, жастарды тәрбиелеудің жаңа тәсілдері туралы сұрады.
Тұрғындарды жеке қабылдау кезінде азаматтар денсаулық сақтау саласына қатысты сауалдарын қойды. Олар ауданда қажетті медицина қызметкерлері жетіспейтінін тілге тиек етті. Бес баланың анасы кондитерлік кәсібін кеңейтуді жоспарлап отыр, оған кәсіпкерлікпен айналысу үшін грант қажет. Жас дәрігерлер баспанамен қамту мәселесін көтерді. Тағы басқа да сұрақтар қойылды. Облыс әкімі Нұрымбет Сақтағанов әрбір өтінішті жеке бақылауына алды.
Сонымен қатар аймақ басшысы аудандық аурухананы, «Қазпошта» бөлімшесін, коммуналдық техниканы қарап шықты. Сондай-ақ ауылдың су құбыры желілерінің қайта жаңғыртылуын және Марқакөл интернат-колледж мектебін аралады. Облыс әкімі білім ордасының шатырын жөндеу қажеттігін назарға алып, жауапты орындарға тапсырма берді.
