Өскемен қаласында полиция қызметкерлері мопед және мотовелосипед жүргізушілеріне заң талаптарын сақтау жөнінде ескерту жасады. Бұл туралы облыстық полиция департаменті мәлім етті, деп хабарлайды F16.kz.
Ведомство мәліметінше, былтырғы 5 сәуірден бастап «Жол қозғалысы туралы» заңға енгізілген өзгерістер күшіне енді. Енді мопедтер мен мотовелосипедтер ресми түрде механикалық көлік құралдарына теңестірілді.
Жаңа талаптарға сәйкес, қозғалтқыш қуаты 4 кВт-қа дейінгі және сағатына 50 шақырымға дейін жылдамдықпен жүретін көлік иелері міндетті түрде:
- көлікті арнайы халыққа қызмет көрсету орталығында тіркеуі
- мемлекеттік нөмір мен техникалық паспорт алуы
- «A1» санатындағы жүргізуші куәлігіне ие болуы керек.
(Егер жүргізушіде «A» немесе «B» санаты болса, қосымша оқу талап етілмейді.)
Шығыс Қазақстан облысының тұрғындары тіркеу рәсімін арнайы ХҚКО бөлімшелерінде жүргізе алады. Ондай халыққа қызмет көрсету орталықтары Өскемен қаласы Самар тас жолы, 23/1 мекен жайында, сондай-ақ Риддер, Шемонаиха, Зайсан және Алтай аудандарында жұмыс істейді.
Тіркеу үшін жеке куәлік пен көлік құралының техникалық құжаты қажет. Мемлекеттік баж салығының мөлшері:
тіркеу – 1081 теңге
техникалық паспорт – 5406 теңге
мемлекеттік нөмір – 5406 теңге.
Полиция заң талаптарын бұзғандар әкімшілік жауапқа тартылатынын ескертеді. Тіркелмеген көлікпен жүргенге 10 айлық есептік көрсеткіш (АЕК) көлемінде айыппұл салынады. Ал жүргізуші куәлігінсіз басқарса 20 АЕК айыппұл қарастырылған.
Құқық қорғау органдары жол қозғалысы қауіпсіздігін сақтау үшін барлық жүргізушілерді жаңа талаптарды қатаң ұстануға шақырады.
