Биыл ел Үкіметі экономиканың нақты секторын жедел дамытуға сенімді түрде кірісті. Мемлекет IT мен логистикадан бастап, тамақ өнеркәсібі, құрылыс, машина жасау мен химияға дейінгі басты салалардағы шағын және орта бизнестің инвестициялық жобаларына ашық тапсырыс жариялады, деп хабарлайды F16.kz.
Ұлттық экономика министрлігінің мәлімдеуінше, алды тұрған үлкен міндеттің бірі – шағын бизнесті орта және ірі бизнестің деңгейіне жеткізу. Қазір осы бағытта ауқымды жұмыстар жүргізіліп жатыр.
Кәсіпкерлерге «Даму» қоры айтарлықтай қолдау көрсетіп жатыр. Атап айтқанда, несиеге кепілдік беру көлемі едәуір артты. Енді кепіл жеткіліксіз болса, мемлекет жобаның 85%-ға дейінгі құнын жабады. Соның арқасында, елімізде жаңа өндірістерді іске қосуға мүмкіндік артады.
Бұл саясаттың нәтижесі де іс жүзінде көрініс таба бастады. 2010 жылдан бері «Дамудың» қолдауымен химия өнеркәсібі саласындағы 512 жобаға 195 млрд теңге берілді. Сол сияқты 30,4 млрд теңге субсидия төленді. Алматы, Ақтөбе, Павлодар мен Алматы облыстарында ең көп жоба жүзеге асырылды.
Отандық өндірушілеріміз өз жетістігі мен өнімін осы күндері Астанадағы EXPO халықаралық көрме орталығында өтіп жатқан VIII жыл сайынғы Ulttyq ónim көрмесінде назарға ұсынды. Оған еліміздің барлық өңірінен 350 кәсіпорын келді. Олардың қатарында маңғыстаулық «Каспийгрупп» компаниясы да бар. Ол ыдыс жууға арналған заттан бастап, тұрмыстық химияның кең ассортиментін шығарады. Атап айқанда, жуғыш ұнтақтар, оттегі ағартқыштары, гель мен сұйық заттар. Өндірістік алаңдар Ақтау мен Алматыда жұмыс істесе, өнімдері Қазақстанның алты өңіріне жеткізіледі.
Өз өнімін өндіретін келесі қатысушы астаналық Yarko компаниясы. Ол ұдайы дамып, керегесін кеңейте түсті.
Yarko өнімдері бүгінде елордалық сауда орындарында сатылады. Өңірлік дистрибьюторлар арқылы да кеңінен таратылады. Компания сонымен қатар «Халал» сертификатына ие. Ұлттық стандарттарға да толық сәйкес келеді.
Ulttyq ónim көрмесі мемлекеттік қолдау арқылы толымды табысқа қол жеткізудің жарқын үлгісі бола отырып қазақстандық бизнесті өркендетудің негізгі алаңы болып қала береді.
Фото: ҚР Ұлттық экономика министрлігі
