ШҚО-да тыйым салынған аймақтарда балық аулау құралдарын және моторлы қайықтарды пайдаланып, заңсыз кәсіппен айналысқан үш браконьерлік топ ұсталды, деп хабарлайды F16.kz тілшісі Polisia.kz сайтына сілтеме жасап.
Облыстық полиция департаментінің ұйымдасқан қылмысқа қарсы күрес басқармасы облыстық прокуратурамен бірлесе отырып, Зайсан көлінде браконьерлікке қарсы бағытталған жедел алдын алу шараларын жүргізді.
Нәтижесінде бір топ Тарбағатай ауданының Қарой ауылы маңында ұсталды. Олар көксерке, шортан, табан секілді балықтарды заңсыз аулап, жалпы салмағы 130 келіге жуық балық тәркіленді. Сонымен қатар моторлы қайық пен ау құралдары алынды. Табиғатқа келтірілген залал көлемі 700 мың теңгеден асты, — делінген хабарламада.
Марқакөл ауданындағы Шеңгелді ауылы маңында тағы екі браконьерлік топ ұсталған. Бірінші топтан көптеген ау құралдары, моторлы қайық және мемлекеттік тіркеу нөмірі жоқ көлік тәркіленіп, 117 келіден астам заңсыз ауланған балық анықталды. Материалдық шығын — 780 мың теңге.
Екінші топтан да жүзу және балық аулау құралдары, автокөлік тәркіленіп, 50 келіден астам балық алынған. Бұл әрекеттен келген залал — 322 мың теңге.
Аталған фактілер бойынша ҚР Қылмыстық кодексіне сәйкес сотқа дейінгі тергеу амалдары басталды. Қазіргі уақытта тергеу органдары барлық мән-жайларды анықтап, кінәлі тұлғаларды заң аясында жауапкершілікке тарту шараларын жүргізіп жатыр.
