Бүгіннен бастап елімізде «Наурыз» атты мемлекеттік жеңілдетілген ипотека бағдарламасы ресми түрде іске қосылды, деп хабарлайды F16.kz.
Бағдарлама аясында қазақстандықтар алғашқы тұрғын үйін небәрі 10% бастапқы жарнамен және жылдық 7%-дан басталатын мөлшерлемемен рәсімдей алады.
Өтінім қабылдау мерзімі – 3 қарашадан 1 желтоқсанға дейін. Өтініштерді тек онлайн форматта Baspana Market порталы арқылы беру қажет.
Бағдарламаға жасы 18 бен 63 жас аралығындағы «Отбасы банкінің» салымшылары қатыса алады. Депозитінде кемінде 2 миллион теңге болуы керек. Сондай-ақ өзінде және отбасы мүшелерінде соңғы 5 жылда үйі болмауға тиіс.
Несиелеу шарттары және бастапқы жарна:
- 10% – егер пәтер таза әрлеуде болса;
- 20% – егер пәтер екінші нарықтан немесе қарапайым әрлеуде болса.
- Пайыздық мөлшерлеме:
- 7% (ЖТСМ – 7,1%) – әлеуметтік осал топтарға;
- 9% (ЖТСМ – 9,4%) – өзге қатысушыларға.
Қарыз сомасы:
Аймақтарда – 30 миллион теңгеге дейін;
Астана мен Алматыда – 36 миллион теңгеге дейін.
Мерзімі: 19 жылға дейін.
Қандай тұрғын үй сатып алуға болады?
- Астана, Алматы және облыс орталықтарында – тек жаңа тұрғын үй (құрылыс компаниясынан).
- Моноқалалар мен ауылдарда – жаңа да, екінші нарықтағы тұрғын үйді сатып алуға болады.
Тұрғын үй таңдау және өтінім беру рәсімі Baspana Market платформасы арқылы жүргізіледі.
