Шығыс Қазақстан облысының «Нұртау» тау-шаңғы курорты саудаға шығарылды. Нысанның бағаланған құны 11,9 млрд теңге шамасында, деп хабарлайды F16.kz.
Глубокое ауданы, Бобровка ауылының маңында орналасқан демалыс аймағы қашқын бизнесмен Анатолий Балушкинге тиесілі болған. Балушкин былтыр алаяқтық және мемлекетке 174 млрд теңге шығын келтіру ісі бойынша сырттай 9 жылға сотталған.
Қазір курорт Қаржы министрлігінің Шығыс Қазақстан облысы бойынша мемлекеттік мүлік және жекешелендіру департаментінің балансында тұр.
Сатушы әлеуетті сатып алушылардан өтінімдерді 2026 жылғы 9 қаңтарға дейін қабылдайды. Сауда сол күні 10.00-де өтеді. Нысанға шектеу қойылған. Демалыс базасы көпшілік демалысын ұйымдастыруға арналған.
Саудаға кепілдік жарна қажет емес, яғни демалыс базасын кез келген тұлға сатып ала алады. Сонымен қатар сауда барысында демалыс базасын тек бір қатысушыға сату мүмкіндігі бар, дегенмен мемлекет көбінесе саудаға кемінде екі қатысушының болуы талап етіледі.
2025 жылғы сәуірде Қазақстан соты «Бипэк Авто – Азия Авто» компаниялар тобының бұрынғы басшыларына сырттай үкім шығарды. Анатолий Балушкин 9 жылға бас бостандығынан айырылды.
Ал 2022 жылы осы іс аясында сотқа 77 жылжымайтын мүлік нысанын сотқа дейін тәркілеу туралы өтініш жолданған. Олардың қатарында «Рахман қайнары», «Нұртау» және «Порт Фортуна» демалыс базалары бар.
