Өскеменде «Ғажайыпқа толы Жаңа жыл!” атты дәстүрлі Президент шыршасы ұйымдастырылды. Салтанатты шараға облыстың қала-аудандарынан 200 бала қатысты, деп хабарлайды F16.kz.
Жарқын да көңілді мерекеде балаларға арнап қызықты сайыстар, интерактивті ойындар және сүйікті ертегі кейіпкерлерімен кездесу өтті. Ертеңгілікте балалар көңілді сайыстарға белсене қатысып, би билеп, ән айтты.
Ескі жылды шығарып салып, санаулы күнде жаңа жылды қарсы аламыз. Үлкен болсын, кіші болсын осы таңғажайып мерекеден тек жақсылық күтеміз. Сіздер бақыттысыздар. Президентіміз Қасым-Жомарт Кемелұлы Тоқаев бүлдіршіндердің дамуына үнемі ерекше көңіл бөледі. Еліміздің әр өңірінде өтіп жатқан шара осының дәлелі. Сіздер бүгінгі Президент шыршасына өз еңбектеріңіздің, білімдеріңіз бен жетістіктеріңіздің арқасында қатысып жатырсыздар. Алдағы уақытта да тек білімді ұрпақ болып шығатындарыңызға сенемін, — деді облыс әкімі.
Қатысушылар арасында жетім, ата-анасының қамқорлығынсыз қалған, аз қамтылған және көпбалалы отбасылардан шыққан және оқуда, спортта, шығармашылықта жетістікке жеткен дарынды балалар бар.
Жаңа жылды асыға күтемін. Биылғы мереке мен үшін ерекше өтіп жатыр. Президент шыршасына қатысқаныма өте қуаныштымын. Үнемі теледидардан тамашалайтын кейіпкерлермен кездесіп, түрлі ойын ойнап, көңіл көтердік. Тек озат оқып, белсенді оқушы болуға барымды саламын, — деді Айару Мәукеш.
Іс-шара соңында Президент шыршасына қатысушыларға 150 000 теңге көлемінде ақшалай сертификат пен тәтті сыйлықтар табысталды.
