Жібек маталар комбинаты ауданында орналасқан «Өскемен» аллеясы абаттандыруды қажет етеді. Бұл туралы демалыс орнына барған қала әкімі Алмат Ақышов айтты, деп хабарлайды F16.kz.
– Тұрғындар тарапынан аллеяда жарықтың жеткіліксіздігіне қатысты шағым көп айтылған болатын. Бүгін бұл шағымның бәрі негізді екеніне көзім жетті. Осыған байланысты жауапты қызметтерге жарықтандыру инфрақұрылымын жаңғырту және нығайту жөнінде нақты тапсырмалар берілді, – деп атап өтті қала басшысы әлеуметтік желідегі парақшасында.
Әкімнің айтуынша, аллеяда жарықтан өзге де проблема жетеді екен. Олардың дені абаттандыруға қатысты. Халық көптеп келетін демалыс орнында урналар мен орындықтар жетіспеушілігі байқалады. Сондай-ақ аумақтың тазалығы мен көгалдандырылуына қатысты мәселе көп.
Қала әкімі ТҮКШ бөліміне, сондай-ақ жауапты мекемелерге мәселені тез арада шешу жөнінде тапсырма берді. Әйтпеген жағдайда, қатаң шаралар қолданылатынын ескертті.
