Өскемен гарнизонында Қасым Қайсенов атындағы механикаландырылған бригадада атыс даярлығы бойынша жоспарлы сабақ өтті. Жауынгерлік атыс кезінде мотоатқыш, шабуылдаушы және танк взводтарының әскери қызметшілері шынайы ұрыс жағдайына барынша жақындатылған күрделі тактикалық жағдайда тапсырмаларды орындады.
Сабақ барысында әскери қызметшілер штаттық қару-жарақтан нысананы жою және атысты басқару практикалық әрекеттерін пысықтады. Сонымен қатар қарумен жұмыс істеу дағдыларын жетілдіруге, жүріп бара жатқан жауынгерлік машинадан оқ атуға, тактикалық іс-қимылдарды үйлестіруге және қауіпсіздік талаптарын қатаң сақтауға ерекше назар аударылды. Батальон командирі, майор Мерей Исеновтің айтуынша, оқу-жаттығулар күндіз де, түнде де өткізілген.
Атыс даярлығы барысында бөлімшелердің өзара үйлесімді іс-қимылы жетілдірілді. Жеке құрам тактикалық, инженерлік және әскери-медициналық даярлық бойынша да білімдерін толықтырды. Күрделі ауа райы жағдайына қарамастан, әскери қызметшілер жауынгерлік техниканы жүргізу және әртүрлі атыс қаруларынан, гранатаатқыштардан, сондай-ақ жауынгерлік машиналардың қару-жарағынан ату бойынша нормативтерді сәтті орындады, — деді ол.
Жауынгерлік дайындықтың бұл кезеңінде взводтардың тактикалық іс-қимылы мен нысаналарды жою нәтижелері бағаланды. Өткізілген сабақтар әскери қызметшілердің кәсіби шеберлігін арттырып, кез келген жағдайда жедел әрі үйлесімді әрекет ету қабілетін дамытуға мүмкіндік берді.
