Бүгін Өскеменде 99 жастағы қарт майдангер Макар Харинге құрмет көрсетілді. Ұлы Отан соғысының ардагерін туған күнімен құттықтауға қалалық қорғаныс істері жөніндегі басқарманың өкілдері, Қазақстан Қарулы Күштерінің ардагерлері жиылды, деп хабарлайды F16.kz.
Макар Харин сияқты ардагерлердің ерлігі – ел тарихының алтын қазынасы. Біз олардың майдандағы қайсарлығы мен бейбіт өмірдегі еңбегін әрдайым бағалаймыз. Ардагерімізге мықты денсаулық, ұзақ ғұмыр тілейміз, – деді ШҚО Қорғаныс істері жөніндегі департаментінің ардагерлермен жұмыс қызметінің инспекторы запастағы подполковник Даулетхан Кәсенов.
Сонымен қатар құттықтай келгендер қарияға Қазақстан Республикасының қорғаныс министрінің арнайы жолдаған құттықтау хатын салтанатты түрде табыстады.
Макар Харин 1926 жылдың тамызында Ресейдің Алтай өлкесі, Чарыш ауданы, Маралиха ауылында дүниеге келген. Ол 1943 жылы әскер қатарына шақырылып, 52-гвардиялық атқыштар дивизиясының 153-гвардиялық атқыштар полкінде минометші болды. Ленинград және Балтық майдандарында шайқасқан жауынгер 1944 жылы ауыр жарақат алып, запасқа шығарылды. Елге оралған соң туған ауылында мал бағып, жылқы өсірді. Кейін үй құрылысы комбинатында, облыстық газ шаруашылығында еңбек етті.
Макар Харин «II дәрежелі Отан соғысы» орденімен, сондай-ақ «1941-1945 жылдардағы Ұлы Отан соғысында Германияны жеңгені үшін» медалімен марапатталған.
Қазір ардақты ардагер Өскемен қаласында тұрып жатыр.
