Бүгін, 9 мамырда Өскеменде мерекелік іс-шаралар аясында ауыл шаруашылығы жәрмеңкесі өтті. Сауда алаңдары қаладағы екі ірі орында — «Алтай» көтерме-тарату орталығы мен «Дос-Нар» сауда үйі аумағында ұйымдастырылды, деп хабарлайды F16.kz.
Жәрмеңкеде тұрғындарға жергілікті тауар өндірушілердің өнімдері нарықтағы бағадан 15–20 пайыз төмен ұсынылды. Қала тұрғындары жаңа сойылған малдың етін, көкөніс және өзге де азық-түлік тауарларын тиімді бағамен сатып алды.
Жәрмеңкеде жалпы көлемі 10 тонна ет өнімі сатылды. Оның ішінде сиыр, жылқы, қой және шошқа еті болды. Сонымен қатар 6 тонна көкөніс өнімі — картоп, пияз, сәбіз және қырыққабат саудаға шығарылды.
Негізгі өнімдерден бөлек, келушілерге сүт тағамдары, шұжық өнімдері, бал және басқа да азық-түлік түрлері кең көлемде ұсынылды.
Ұйымдастырушылардың айтуынша, мұндай жәрмеңкелер тұрғындарды сапалы әрі қолжетімді азық-түлікпен қамтамасыз етуге, сондай-ақ жергілікті ауылшаруашылық өндірушілерін қолдауға бағытталған.
