Кеше түнде облыс орталығының сол жағалау аудандарында коммуналдық апат болды. Қазір апат салдары жойылып, инженерлік желілер қалыпты режимде жұмыс істеп тұр, деп хабарлайды F16.kz.
Өскемен қаласы әкімінің баспасөз қызметі ұсынған ақпаратқа сүйенсек, 2026 жылғы 26 қаңтарда сағат 03.20-да Өскемен қаласының сол жағалау бөлігінде электр қуаты ажыратылып, соның салдарынан жылумен жабдықтау жүйесінің жұмысы уақытша тоқтатылған. Атап айтқанда, Жібек маталар комбинаты №2 қазандық, Ахмер ауылының №5 қазандығы, Меновное ауылының №6 және №7 қазандықтары істен шықты.
Сондай-ақ келесі сорғы станцияларында жабдықтар уақытша ажыратылды:
«Этносаябақ» ППНС;
«Сатпаев» ПНС;
Металлург кентіндегі №1, №2, №3 орталық жылу пункттер.
Қазір электрмен жабдықтау толық қалпына келтірілді, барлық қазандық іске қосылып, қалыпты режимде жұмыс істеп тұр. Қаланың сол жағалау бөлігіндегі жылу желілерінің гидравликалық режимін қалпына келтіру жұмыстары аяқталды. Жағдай тиісті қызметтердің тұрақты бақылауында. – деп жазды Өскемен қаласы әкімінің баспасөз қызметі.
Ажырату кезінде қаланың оң жағалау бөлігіндегі жылу желілерінде қысым күрт көтерілген. Соның салдарынан Новаторов көшесі 2-үй мен Назарбаев даңғылы 6-үй маңындағы жылу желілерінде ақау пайда болған. Қазір тиісті мамандар ақауларды жөндеп жатыр.
Сондай-ақ мамандар алдағы уақытта болуы ықтимал апаттың алдын алу үшін магистральды және кварталішілік жылу желілерін тексеруге кірісті.
