Өскемендегі өнеркәсіп кәсіпорындарының бірінде жарылыс болып, өрт шықты, деп хабарлайды F16.kz.
ШҚО төтенше жағдайлар департаменті баспасөз қызметінің мәліметінше, жарылыс зауыт цехындағы шаң тұту құрылғысында газ-ауа қоспасынан болған. Соның салдарынан өрт шығып, нысанның қабырғасы опырылған.
Құтқарушылар оқиға орнына жеткен кезде нысан өртеніп жатқан. Қазір апат болған жерде Төтенше жағдайлар министрлігінің бөлімшелері жұмыс істеп жатыр.
Мамандар зардап шеккендер бар-жоғын шұғыл тексеруге кірісті. Жедел штаб құрылды. Зардап шеккендер туралы нақты ақпарат әзірге жарияланған жоқ, – деп хабарлады ШҚО ТЖД баспасөз қызметі.
Осы сәтте облыстық экология департаментінің мамандары оқиға орнына аттанды. Экологтар атмосфералық ауаға бөлінуі ықтимал зиянды газдың мөлшерін анықтауға кірісті.
Экология департаменті санитариялық-қорғау аймағы шекарасында атмосфералық ауа сапасын арнайы аспаптармен тексеріп жатыр. Тексеру нәтижесі қосымша хабарланады, – деп жазды экология департаментінің баспасөз қызметі.
