Риддер жылу электр орталығы кешенді жаңғыртудан кейін апат қауіпі жоғары «қызыл аймақтан» шығып, «сары аймаққа» кірді. Бұл мақсатқа Үкімет резервінен жиыны 21 млрд теңгеден астам қаражат бөлінген, деп хабарлайды F16.kz.
Кешілер шаһарына жұмыс сапарымен барған Шығыс Қазақстан облысының әкімі Нұрымбет Сақтағанов 50 мыңға жуық тұрғыны бар моноқаланы жылумен қамтамасыз етіп тұрған кәсіпорынға арнайы ат басын бұрып, қазіргі жай-күйімен танысты.
Мемлекет басшысының тапсырмасына сәйкес, Риддер қаласының жылу электр орталығын қайта жаңғыртудан өткізуге кейінгі 3 жылда Үкімет резервінен және жергілікті бюджеттен 21 млрд теңгеден астам қаражат бөлініп, іске асырылды. Соның арқасында қазандықтардың тозуы 82 пайыздан 43 пайызға дейін төмендеді, ал жылу желілерінің тозуы 85 пайыздан 59 пайызға дейін азайды. Жалпы ұзындығы 26 км болатын екі қатарлы жылу желілері жаңартылды, – деді Нұрымбет Сақтағанов.
Аймақ басшысының айтуынша, биыл бесінші және алтыншы қазандықтарды күрдел жөндеу, 3 км жылу желісін жаңарту, 17 жылу камерасын ауыстыру жоспарланған. Бұл жұмыстар іске асырылса келер жылы Риддер ЖЭО «жасыл аймаққа» өтеді.
2022 жылы туындаған қаржылық қиындықтарға байланысты кәсіпорынды тастап, басқа салаларға кеткен мамандар бүгінде сүйікті жұмыс орнына қайта оралып, жылу орталығында еңбек етіп жатыр. Қазір ЖЭО жұмысшылары шамамен 378 мың теңге көлемінде жалақы алады.
