Самар ауылының тұрғындары 30 жылға жуық уақыт бойы орталық жылусыз өмір сүрді. Бүгінде ауылда тұрғындардың үйлеріне жылу қайта оралатын ең маңызды әрі көптен күткен инфрақұрылымдық жобалардың бірі – жылумен жабдықтау жүйесін қалпына келтіру жұмыстары жүзеге асырылуда, деп хабарлайды F16.kz.
Самар ауылында жылу желілерін ауқымды жаңғырту жұмыстары жалғасуда. Аудан орталығы тұрғындары үшін бұл жобаның маңызы ерекше. Өйткені мұнда орталықтандырылған жылу жүйесі 1997 жылдан бері жұмысын тоқтатқан болатын. Кейіннен жылу желілері қирап, жылумен жабдықтау жүйесі іс жүзінде жойылды.
Бүгінде жағдай түбегейлі өзгеруде. 2025 жылдан бастап аудан орталығында жылумен жабдықтау жүйесін қалпына келтіру және жаңғырту жөніндегі ірі жоба жүзеге асырылып жатыр. Жоба аясында 12,2 шақырым жылу желісін қайта жаңарту жоспарланған.
Ауылда орталықтандырылған жылу жүйесі соңғы рет шамамен 30 жыл бұрын жұмыс істеді. Бұрын салынған бес қабатты үйлерді жылыту мүмкін болмай, уақыт өте келе бос қалды. Ал екі және үш қабатты үйлердің сақталып қалуына тұрғындардың пәтерлеріне пеш пен халық арасында «буржуйка» деп аталатын пештер орнатып, қыс мезгілінде үйлерін өздері жылытып келгені себеп болды.
Бұл тұрғындарға айтарлықтай қолайсыздық туғызды. XXI ғасырда еліміздің және облысымыздың даму деңгейін ескерсек, мұндай жағдайға жол беруге болмайды. Сондықтан 2025 жылы Шығыс Қазақстан облысының әкімі Нұрымбет Сақтағановтың халықпен кездесуінде көтерілген алғашқы мәселелердің бірі орталық қазандық салу болды. Бүгінде сол уәде жүзеге асырылып жатыр.
Биыл алты шақырым жылу трассасының құрылысын толық аяқтау жоспарланып отыр. Ол шамамен 30 көпқабатты тұрғын үйді, сондай-ақ Мәдениет үйі, аудандық аурухана мен мектептерді қоса алғанда, 11 әлеуметтік нысанды жылумен қамтамасыз етеді.
Егер қаржыландыру жоспарға сәйкес жүргізілсе, онда Самар ауылы 2027 жылғы жылыту маусымына орталықтандырылған жылу жүйесімен кіреді, — деді Самар ауданының әкімі Серік Жеңісов.
Қазіргі уақытта құрылыс-монтаж жұмыстары бекітілген кестеге сәйкес жүргізілуде. Жобаны 2027 жылдың 31 желтоқсанына дейін аяқтау жоспарланып отыр.
Жобаның жүзеге асырылуы тұрғындарға араға шамамен отыз жыл салып орталықтандырылған жылу жүйесін қайта пайдалануға мүмкіндік береді. Жаңа әрі заманауи жылумен жабдықтау жүйесі ауыл тұрғындарының өмір сүру жайлылығы мен сапасын едәуір арттырады деп күтілуде.
