Самар ауданында туристік бағыттар мен Бұқтырма су қоймасының жағалауына апаратын облыстық маңызы бар Көкпекті – Самар – Васильев өткелі автомобиль жолын жөндеу жалғасып жатыр, деп хабарлайды F16.kz.
Жоба Мемлекет басшысының көлік инфрақұрылымы мен ішкі туризмді дамыту жөніндегі тапсырмаларын орындау аясында, Шығыс Қазақстан облысының әкімі Нұрымбет Сақтағановтың қолдауымен қолға алынды.
Өткен жылы аталған жолдың 30 шақырымына орташа жөндеу жасалса, биыл Миролюбовка мен Сарыбел ауылдарының арасындағы тағы 30 шақырымдық учаске жаңартылып жатыр. Нысанда мердігер ұйым — «ДСУ-14» ЖШС-нің 14 арнайы техникасы тартылған.
Жобаның нәтижесінде Самар ауданының туристік аймағына, сондай-ақ Сарыбел мен Новостройка ауылдарына қатынау әлдеқайда жеңілдейді. Сонымен қатар, өңір тұрғындары мен қонақтары Бұқтырма су қоймасының жағалауына қауіпсіз әрі жайлы жолмен қатынай алады.
Көкпекті – Самар – Васильев өткелі автомобиль жолындағы жөндеу жұмыстарын толық аяқтау 2027 жылға жоспарланған.
