Биыл Шығыстың бас шаһарында тұрғын үйлердің сыртқы келбетін жақсартуға бағытталған ауқымды жұмыс жалғасын тапты. Жоба көпқабатты үйлерді өайта қалпына келтіру және жөндеу қағидалары аясында жүзеге асырылып, қаланың сәулеттік бірегейлігін қалыптастыруға, эстетикалық тартымдылығын арттыруға және ғимараттардың техникалық жағдайын жақсартуға бағытталған, деп хабарлайды F16.kz.
Өскемен қалалық тұрғын үй қатынастары бөлімінің мәліметінше, бұл бастама жүйелі сипатқа ие және ең алдымен сыртқы келбеті тозған, жаңартуды қажет ететін аудандарды қамтиды. Сонымен қатар үйлердің энергия тиімділігін арттыру да басты назарға алынады.
Қазірдің өзінде бірнеше тұрғын үйдің сыртқы қабырғаларын жаңарту жоспарланған. Атап айтқанда, Әуезов даңғылы 49б, Нұрмағамбетов көшесі 50 және 53, сондай-ақ Протазанов көшесі 61 мекенжайларында орналасқан үйлер қамтылып отыр. Бұл нысандар бойынша мердігер ұйым анықталып, құрылыс басталып кеткен.
Жөндеу барысында заманауи құрылыс материалдары мен технологиялар қолданылады. Соның ішінде фиброцементті панельдер пайдаланылады. Бұл материал жоғары беріктігімен, температураның күрт өзгеруіне төзімділігімен және сыртқы ортаның әсеріне шыдамдылығымен ерекшеленеді. Мұндай шешім тек ғимараттың сыртқы көрінісін жаңартып қоймай, оның қызмет ету мерзімін ұзартуға және алдағы күтім шығындарын азайтуға мүмкіндік береді.
Жоба бойынша жұмыс шамамен үш ай ішінде аяқталады деп жоспарланған. Осы уақыт аралығында аталған үйлердің қасбеттері толық жаңартылып, заманауи талаптарға сай бірыңғай стильге келтіріледі.
Қалалық тұрғын үй қатынастары бөлімі тұрғын үй инспекциясы секторының меңгерушісі Қымбат Әбішев бұл бағыттағы жұмыстар кезең-кезеңімен жүзеге асырылып жатқанын атап өтті.
Қаланың сыртқы келбетін жақсарту бағдарламасы аясында көпқабатты үйлердің қасбетін жөндеу жұмысы жоспарлы түрде жүргізіледі. Бүгінде мердігер ұйым анықталып, Әуезов даңғылы мен Нұрмағамбетов және Протазанов көшелеріндегі үйлерді жаңарту басталды. Қолданылып жатқан заманауи материалдардың арқасында ғимараттардың қызмет ету мерзімі ұзарып, көрер көзге тартымды болады, – деді ол.
Маманның айтуынша, бұл жұмыс мұнымен шектелмейді. Бағдарламаның келесі кезеңінде Әуезов даңғылы бойындағы басқа да көпқабатты үйлерді қамту жоспарланып отыр.
Жалпы алғанда, атқарылып жатқан шаралар – қалалық инфрақұрылымды жаңғыртуға бағытталған кешенді жұмыстардың бір бөлігі. Қасбеттерді жаңарту арқылы қала келбеті жақсарып қана қоймай, тұрғындарға қолайлы әрі үйлесімді орта қалыптасады.
