Тарабағатай ауданының Жетіарал ауылында мүгедектігі бар жандарға жан-жақты қызмет көрсететін 90 орындық оңалту орталығы ашылады. Бұл туралы Шығыс Қазақстан облысының әкімі Нұрымбет Сақтағановтың ауданға жұмыс сапары кезінде мәлім болды, деп хабарлайды F16.kz.
Аймақ басшысының тапсырмасымен шекара маңындағы аудандарда тұратын мүгедектігі бар адамдарды, оның ішінде ерекше қажеттіліктері бар балаларды оңалту мақсатында Жетіарал ауылында бос тұрған бұрынғы мектеп ғимаратын жаңғырту қолға алынған. Атқарылып жатқан жұмыстың барысымен танысқан облыс әкімі орталықты қажетті құрал-жабдықпен және кадрлармен қамтамасыз ету мәселесіне назар аударды.
Орталықты Жетіарал ауылындағы бос тұрған мектеп ғимаратының негізінде ашу жоспарланған. Қазір жобалық-сметалық құжаттама әзірленді. «Қазақстан халқына» корпоративтік қорының қолдауымен және Baquatty aimaq qory жобасы аясында мекемені қажетті құралдармен жабдықтау және мамандарды даярлау көзделіп отыр, – деді Нұрымбет Сақтағанов.
Бүгінде Тарбағатаймен іргелес жатқан Марқакөл, Зайсан және Күршім аудандарында шамамен 3386 мүгедектігі бар адам бар, оның 291-і ерекше қажеттіліктері бар бала.
