Өскеменде «Менің елімдегі заң және тәртіп» атты балалар сурет байқауының қорытындысы шығарылып, жеңімпаздар марапатталды, деп хабарлайды F16.kz.
Бұл байқау Өскемен қалалық әкімдігі мен прокуратурасының бастамасымен 12-17 жас аралығындағы жас суретшілер арасында өткізілді. Жеңімпаздар Оралхан Бөкей атындағы қалалық кітапханада марапатталды. Мұнда жас суретшілердің туындыларынан көрме ұсынылды.
Сурет байқауына «Заң және тәртіп» тақырыбы бекер таңдалған жоқ. Президентіміз Қасым-Жомарт Тоқаев құқық қорғау органдарының кеңейтілген алқа мәжілісінде сөйлеген сөзінде барлық мемлекеттік және құқық қорғау органдары жұмысының басты желілерінің бірі – заң мен тәртіпті баса атап өтті. Осы тақырыпта түрлі суреттер ұсынылды, әрқайсыңыз тақырыпты түрлі көзқараста жеткіздіңіздер. Байқау қысқа мерзімде өткізілгеніне қарамастан қатысушылар көп болғанына қуаныштымын, – деді Өскемен қаласы әкімінің орынбасары Ирина Смит.
Байқауға барлығы 40 сурет келіп түскен. Солардың ішінен үш жеңімпаз ақшалай жүлде мен мадақтамаларға ие болды. Өзге қатысушыларға арнайы алғыс хаттар табысталды.
Мен өз суретімде қаламыздағы «Қазақстан» тауын, әділдік құдайы фемиданы, полиция қызметкерлерін, адвокаттар мен заңгерлерді бейнеледім. Олардың барлығы бізді қоғамдағы түрлі заң бұзушылық әрекеттерден қорғайды, – деді бірінші орын алған Аружан Алмасқызы.
Дана Әбдікәрім
