Шемонаиха қаласында тұратын кәсіпкер Полина Висмер «Ауыл аманаты» жобасы аясында жеңілдетілген несие алып, глютенсіз нан-тоқаш өнімдерін өндіретін заманауи цех ашты, деп хабарлайды F16.kz.
Полина Висмер «Ауыл аманаты» бағдарламасының арқасында 9,23 млн теңге көлемінде несие алып, Қазақстан мен Ресейден арнайы жабдықтар сатып алған. Нәтижесінде глютенсіз нан-тоқаш өнімдерін пісіретін жаңа цех толыққанды іске қосылды.
Мен ұзақ жылдар бойы денсаулыққа пайдалы, глютенсіз өнім өндіруді қолға алуды ойлап жүрдім. «AMANAT» партиясының «Ауыл аманаты» жобасы арқылы бұл ой нақты іске асты. Қазір біздің цех толық қуатында жұмыс істеп тұр. Тұтынушыларға сапалы әрі табиғи өнім ұсыну – басты мақсатымыз, – дейді Полина Висмер.
Жаңа цехта сағатына 144 бөлке нан, ал тәулігіне 2500 данаға дейін өнім шығаруға мүмкіндік бар. Өндіріс орны заманауи құрал-жабдықтармен толық қамтылған.
Қазіргі уақытта кәсіпорында 15 адам тұрақты жұмыспен қамтылған. Алдағы уақытта кәсіпкер өнім түрлерін көбейтіп, жаңа сорттар мен дәмдік бағыттар шығару арқылы өндіріс көлемін ұлғайтуды жоспарлап отыр.
