Өскеменде облыстық мәслихаттың кезектен тыс XXV сессиясында 2025-2027 жылдарға арналған облыстық бюджетке өзгерістер енгізілу мәселелері қаралды, деп хабарлайды F16.kz.
Республикалық трансферттердің азаюы және кіріс бөлігінің артуына байланысты облыс бюджеті қайта қаралды.
Нақтылау шеңберінде республикалық бюджеттен берілетін нысаналы трансферттер көлемін азайту көзделген.
Оның ішінде Өскемен қаласы 19 шағын ауданындағы 600 орындық мектеп салу бойынша 108,1 млн теңге, Глубокое ауданындағы Белоусовка кенті мен Опытное поле ауылында 300 орындық салу бойынша 233,4 млн теңге, Риддер қаласында 200 төсекке арналған стационар мен 500 келушіге арналған емханасы бар көпсалалы аурухана кешенін салу бойынша 1174,6 млн теңге, Алтай ауданы Серебрянск қаласындағы Некрасов көшесіндегі инфрақұрылымды қайта жаңарту бойынша 150 млн теңге, аудан әкімдерін сайлау және өткізу бойынша 77,3 млн теңге қайтарылды.
Сонымен қатар, республикалық бюджеттен Өскемен қаласында 300 төсектік көпсалалы аурухана құрылысын салуға 20,4 миллиард теңге қосымша қаражат бөлінді.
Облыстық бюджетке өзгерістер енгізу шеңберінде, бюджет кірістерінің 2,9 миллиард теңгеге ұлғаюы арқылы төмендегі қаражаттар бөлінеді:
Білім басқармасы бойынша: тамақтану және білім беру қызметтеріне – 390,0 миллион теңге, педагогикалық қызметкерлердің еңбекақысын төлеуге – 857,8 миллион теңге, облыс аумағындағы білім ұйымдарының коммуналдық қызметтерін төлеуге – 495,2 миллион теңге, 2025 жылға арналған мемлекеттік тапсырысты жеке балабақшаларға қаржыландыруға – 385,0 миллион теңге.
Дене шынықтыру және спорт басқармасы бойынша: жоғары сапалы оқу-жаттығу процесін қамтамасыз ету, чемпиондар мен жүлдегерлерді дайындау үшін қосымша төлемдерге – 93,0 миллион теңге, дене шынықтыру және спорт ұйымдарының коммуналдық қызметтерін төлеуге – 19,7 миллион теңге.
Энергетика және тұрғын үй-коммуналдық шаруашылық басқармасы бойынша: Риддер қаласындағы «Шығыс Жылу» АҚ филиалының ЖЭО технологиялық жабдығын күрделі жөндеуді аяқтауға – 180,3 миллион теңге, Риддер қаласындағы жылу желілерінің 1-15 және 16-23 учаскелерін күрделі жөндеуді аяқтауға – 236,5 миллион теңге, Өскемен қаласындағы «Шығыс Жылу» АҚ көмір сатып алу шығындарын субсидиялауға – 277,2 миллион теңге.
Құрылыс, сәулет және қала құрылысы басқармасы бойынша: Зайсан ауданы Жарсу ауылындағы мектептің спорттық корпусының құрылысын аяқтауға – 20,1 миллион теңге, Айнабұлақ ауылындағы спорттық модульдің құрылысын аяқтауға – 17,7 миллион теңге.
