Шығыс Қазақстан облысының прокуратурасы «Ұлан-Вет» ШЖҚ КМК қызметін тексеру барысында еңбекақыны заңсыз есептеу, қызметкерлерге негізсіз сыйақы беру, белгісіз төлемдер жасау және жалған іссапар шығындарын рәсімдеу деректерін әшкерелеген, деп хабарлайды F16.kz.
Кәсіпорында еңбек және бюджет заңнамасы, бухгалтерлік есеп қағидалары мен еңбекті қорғау талаптарын бұзу фактілері анықталған.
Қызметкерлерге еңбекақыны заңсыз есептеу, негізсіз сыйақы беру, белгісіз төлемдер жасау, жалған іссапар шығындарын рәсімдеу және ТСВҚ (ұстау, стерилизациялау, вакцинациялау және жануарларды қайтару) бағдарламасын іске асыру кезіндегі заңбұзушылықтар тіркелді. Бұдан бөлек, персоналды жеке қорғаныс құралдарымен қамтамасыз етпеу және қауіпсіздік техникасы бойынша міндетті оқытудан өтпеген адамдарды жұмысқа жіберу фактілері анықталды, бұл қызметкерлердің өмірі мен денсаулығына шынайы қауіп төндірген, — дейді облыстық прокуратураның баспасөз қызметі.
Мемлекетке келтірілген шығынның жалпы сомасы 11,3 млн теңгені құрады.
Прокурорлық қадағалау актісі бойынша 5 лауазымды тұлға тәртіптік жауапкершілікке және 2 басшы әкімшілік жауапкершілікке тартылды.
Бүгінде мемлекет кірісіне 5,5 млн теңге өндірілді.
Қалған соманы өндіріп алу және заңдылықты толық қалпына келтіру бойынша жұмыстар жалғасуда.
