Шығыс Қазақстан облысында прокуратураның араласуымен кәсіпорын қызметкерлеріне тиесілі 14 млн теңгеден астам жалақы берешегі толық төленді, деп хабарлайды F16.kz.
ШҚО прокутаруасы баспасөз қызметінің мәліметінше, Самар ауданы прокуратурасы еңбек заңнамасының сақталуына жүргізген талдау барысында «Самар» шаруашылық жүргізу құқығындағы коммуналдық мемлекеттік кәсіпорнында (ШЖҚ КМК) қызметкерлердің құқығы бұзылғанын анықтады. Тексеру барысында кәсіпорынның 53 жұмысшысы екі ай бойы жалақы алмаған.ы белгілі болды.
Прокурорлық қадағалау актісі негізінде қызметкерлердің еңбек құқығы қалпына келтіріліп, жалпы сомасы 14 млн теңгеден асатын берешек толық өтелді.
Сонымен қатар кәсіпорын Қазақстан Республикасының Әкімшілік құқық бұзушылық туралы кодексінің 87-бабы 1-бөлігі бойынша жауапқа тартылып, 129 мың теңге көлемінде айыппұл төледі.
Прокуратураның хабарлауынша, азаматтардың конституциялық құқығын қорғау және еңбек заңнамасының сақталуын қамтамасыз ету – қадағалау органдарының негізгі бағыттарының бірі болып қала береді.
