Жыл басынан бері ШҚО-да 11 мың тұрғын жұмысқа орналасқан, деп хабарлайды F16.kz.
Жалпы облыс бойынша биыл 30 мың адамды жұмыспен қамту жоспарлаған. Қазіргі таңда жергілікті кәсіпкерлер Электрондық еңбек биржасында тағы 4 мың бос жұмыс орнын жариялады.
Жаңа жұмыс орындарының сапасы мен тиімділігіне цифрлық мониторинг жүргізіледі. Облыста іске асырылып жатқан цифрлық трансформация жұмыс берушілердің міндетті зейнетақы жарналарын аударуын, электрондық еңбек шарттарын жасауын ашық көрсетеді. Ал жұмыс орындарын субсидиялау өз кезегінде компания басшыларына еңбекақы төлеу қорына жүктемені азайтуға мүмкіндік береді. ⠀
Біз әлеуметтік осал азаматтарды жұмыспен қамту мәселелеріне ерекше назар аударамыз. Жеке бастамаларды қолдау аясында 340 млн. теңгеге 216 өтеусіз грант беруді жоспарлап отырмыз. Электрондық еңбек биржасында жұмыссыздарға қысқа мерзімді кәсіптік оқыту жүргіземіз. Ал жаңадан енгізілген «Мансап компасы» платформасында бүгінде кәсіби дағдыларын анықтау үшін 6 мыңнан астам оқушы тіркелді, — деді әкім Нұрымбет Сақтағанов.
