Биыл ШҚО-да 630 шақырым жолды жөндеу жоспарланған. Бұл мақсатта 57 млрд. теңгеге жуық қаржы бөлінді. Бұл туралы Өңірлік коммуникациялар қызметі алаңында өткен брифингте ШҚО жолаушылар көлігі және автомобиль жолдары басқармасының басшысы Әсет Сұлтанов мәлімдеді, деп хабарлайды F16.kz.
Бөлінген қаржының 37 млрд. теңгеге жуығы республикалық, 20 млрд. теңгесі жергілікті маңызы бар жолдарға бағытталған.
Өңірде ірі инфрақұрылымдық жобалар кезең-кезеңімен жүзеге асырылып жатыр. Соның бірі – Өскемендегі Сәтпаев даңғылы мен Жібек жолы көшесінің қиылысындағы көлік айрығы. Бүгінде нысан құрылысы белгіленген кестеге сәйкес жүргізіліп жатыр.
Сондай-ақ Пермитин көшесі мен Славский жағалауындағы жолайрықтың құрылысы, Бобровка ауылындағы инфрақұрылымды жаңғырту, Күршім ауылының айналма жолын салу және Ақ Берел өзені арқылы өтетін көпірді жөндеу жұмысы жалғасуда. Ал, Шемонаихадағы Үбі өзені арқылы өтетін көпірді қайта жаңғырту жобасы әзірленіп, мердігер анықталды, — дейді Әсет Сұлтанов.
Айта кетейік, Өскеменде салынатын жаңа көпірдің жобасы да қазір әзірленіп жатыр.
Өңірде туризмді дамытуға серпін беретін бірқатар жобалар да қазіргі күні іске асырылуда. Мәселен, биыл Үлкен Нарын, Бұқтырма су қоймасының жағалауы, Сібе көлдері мен Марқакөлге апаратын автомобиль жолдары ретке келтіріліп жатыр. Жалпы қамтылып отырған учаскелердің ұзындығы 215 шақырымды құрайды.
Өңірде жолдардың сапасына бақылау күшейтілді. Бұл жұмыстар “KazRoadLab” цифрлық платформасы арқылы жүзеге асрылады. Құрылыс жұмыстарына қолданылатын материалдар мен зертханалық сынақтардың ашықтығы қамтамасыз етілген. Бұдан бөлек, облыстық маңызы бар жолдардың цифрлық паспорты толық әзірленді. Биыл бұл жұмыс жергілікті жолдарда да жүргізіледі, — деп атап өтті басқарма басшысы.
Жол қозғалысының қауіпсіздігін арттыру мақсатында Өскемен, Алтай және Риддерде 7 мыңнан астам бейнебақылау камерасы мен 243 «Мерген» аппараттық кешені жұмыс істеп тұр. Алдағы уақытта республикалық және облыстық маңызы бар автомобиль жолдарына фото және бейнетіркеу камераларын орнату мәселесі де қарастырылып жатқан көрінеді.
