Бүгін, Шығыс Қазақстан облысының «Нұртау» тау-шаңғы курортында фристайл-могулдан ел біріншілігінің жалауы желбіреді. Салтанатты рәсімге сайысқа түсер саңлақтармен бірге осы дүбірлі додаға арнайы келген құрметті қонақтар мен жанкүйерлер де жиналды. Чемпионат ерлер және әйелдер арасында өтіп жатыр, деп хабарлайды F16.kz порталы ШҚО денешынықтыру және спорт басқармасының баспасөз қызметіне сілтеме жасап.
Шығыс Қазақстан облысы денешынықтыру және спорт басқармасының жоғары жетістіктер спорты және спорттық резерв бөлімінің басшысы Аида Жұханова қатысушыларға құттықтау сөзін арнап, сәттілік тіледі. Сонымен қатар чемпионатқа Олимпиада чемпионы, ҚР еңбек сіңірген спорт шебері Ольга Рыпакова қатысып, құттықтауын жеткізді.
Бұл байрақты бәсекеге биылғы XXV қысқы Олимпиада ойындарында ел намысын қорғаған шығысқазақстандық үздік фристайлшылардың қатысуы чемпионаттың мәртебесін көтеріп тұр.
Сонымен могулдан сайыс басталды. Жиыны 38 кіл мықты бар шеберлігін паш етіп, жүлделерді сарапқа салады бүгін.
Жарыс халықаралық стандарттарға сәйкес ұйымдастырылып, ұзындығы 200 метрлік кәсіби трассада өтіп жатыр. Спортшылардың шеберлігі мен жылдамдығы көрермендерге керемет көрініс сыйлайтыны анық.
