Шығыс Қазақстан облысында «Заң мен тәртіп» қағидатын жүзеге асыру бағытында атқарылып жатқан жұмыстар талқыланды. Бұл мәселе облыс әкімдігінде өткен жиында қаралды. Басқосуға өңір басшысы Нұрымбет Сақтағанов, құқық қорғау органдарының жетекшілері, қала және аудан әкімдері, сондай-ақ басқарма басшылары қатысты, деп хабарлайды F16.kz.
Жиында облыстық ішкі саясат басқармасының басшысы Айдар Садырбаев облыста заң үстемдігін қамтамасыз ету және азаматтарды құқық бұзушылықтарға төзбеуге шақыру мақсатында кешенді түсіндіру жұмыстары жүргізіліп жатқанын айтты. Оның мәліметінше, өңірде 116 құқық кабинеті жұмыс істеп тұр. Көпқабатты тұрғын үйлердің кіреберістері мен лифттеріне 1400-ден астам тақырыптық ақпараттық стенд орнатылған. Сонымен қатар үш трамвай арнайы сыртқы жарнамамен безендіріліп, алдағы уақытта трамвайлар мен автобустардағы экрандарда бейнероликтер көрсету жоспарланып отыр.
Сондай-ақ Amanat партиясының «Қарызсыз қоғам» жобасы аясында 20 993 тұрғын арнайы оқыту курстарынан өткен. Ал «Құқықтық қамқорлық» акциясы барысында зейнеткерлер мен ерекше қажеттілігі бар азаматтарға алаяқтардан сақтану жолдары түсіндірілген. Былтыр 1 қарашада Жобалық кеңсе іске қосылғалы бері 30-дан астам іс-шара жүзеге асырылған.
Жиын барысында облыс әкімі Нұрымбет Сақтағанов «Заң мен тәртіп» идеологемасының негізгі қағидаттары мен құндылықтары жалпыұлттық деңгейде іске асуы тиіс екенін атап өтті. Оның айтуынша, бұл бағыттағы жүйелі жұмыс ішкі саяси тұрақтылықты нығайтып, қоғам мен мемлекеттің орнықты дамуына оң әсер етеді.
Айта кетейік, жуырда ҚР Бас прокуратурасында өңірлік Жобалық кеңсенің жұмысы қаралып, биылғы жоспарлар талқыланды. Нәтижесінде Шығыс Қазақстан облысының тәжірибесі оң бағаланып, 2026 жылы өңірде түрлі форматтағы 55 іс-шара өткізу жоспарланған.
