Өңірде республикалық, облыстық және аудандық маңызы бар жолдар мен елді мекен көшелерін күтіп ұстау үшін 806 арнайы техника жұмылдырылған. Бұл туралы ШҚО жолаушы көлігі және автомобиль жолдары басқармасы басшысының міндетін атқарушы Ернар Мәулетханов айтты, деп хабарлайды F16.kz.
Оның ішінде респбуликалық маңызы бар жолдарға жауапты «КАЖсервис» облыстық филиалының 103 техникасы мен облыстық бағыттарға жауапты «ОблШығысЖол» кәсіпорнының 119 техникасы дайындалған.
Одан бөлек, климаттық жағдайы қиын аумақтарда жол пайдалану пункттері мен жылыту орындары жұмыс істеп тұр. Мұнда жолаушылар жылынып, демалып, қажетті көмек ала алады.
Қалың қар, қатты аяз бен бұрқасын жел салдарынан республикалық маңызы бар жолдар 20 рет, ал облыстық маңызы бар жолдар 17 рет жабылды. Қауіпсіздік сақтау мақсатында жолдарға шектеу түнгі уақытта қойылады, — деді Ернар Маулетханов.
Басқарма өкілінің айтуынша, боран күшейіп, жағдай күрделенсе іске қосылатын 185 бірлік қосымша техника мен ауыр бульдозерлер, автогрейдерлерден құралған жедел жасақ та дайындалған. 1 қарашадан бастап облыс жолдарына тәулік бойы бақылау жүргізіліп отырады.
